De oi, comenti cumandau de s’ordinantzia de su ministru de sa sauldi Robertu Speranza, sa Sardigna intrat un’atra borta in zona groga. Totu est sussediu poita is ricoverus de sa cida passada in is spiladis fut unu numuru artu. Ma ita mudat po is citadinus? Sa nova est, massimamenti, cussa de s’umperu de sa mascherina po imboddiai nasu e buca. Diventat obrigu a dda tenni sempiri finas chi non seus cun genti meda. Tocat a non si scaresciri de dda tenni comenti besseus de domu.
Castiendu su numuru sempiri prus artu de is vacinaus non ddu at peruna làcana chi non si podit giumpai, no c’at abbisongiu de sa certificatzioni po andai de una parti a s’atra. Torrendu gratzias a su Green Pass non mudat cuasi nudda po is tzilleris o is ristorantis, bastat a sighiri is regulas chi giai teniaus.
Du su primu de friargiu partint finas is regulas noas po su Green Pass, chini no est vacinau no at a podiri imbucai né in su tangu e nemancu in is postas.
Sighit, in su fratempus, a s’abasciai su numuru de is impestaus a su Covid in s’Isula. A dolumannu si contant cuatru mortus e artziat finas su numuru de cussus chi intrant in is aposentus de is spidalis. Cun prus de deximila tamponis fatus funt 795 is impestaus e duncas sa percentuali s’abasciat a su 7,8%.
Cussus chi funt serraus in sa terapia intensiva abarrant sempiri trinta, comenti sa dì a innantis e in mentris funt doxi in prus in is atrus aposentus, fendudendi pesai su numuru a 287. Spantosu est su numuru de cussus chi s’agatant incungiaus in domu po sa cuarantena: 22.303.
Comenti eus nau funt cuatru is mortus de su bulletinu de eriseru: un omini de corantanoi annus e unu de norantadus chi biviant in sa provincia de Tatari, una femina de setantacuatr’annus de sa provincia de Aristanis e un’atra femina de otantanoi annus chi biviat in sa citadi metropolitana de Casteddu.
24 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.google.com/search?q=sardegna+zona+gialla&source=lnms&tbm=isch&sa=X&ved=2ahUKEwi094Shjsr1AhXVgv0HHfvlD1AQ_AUoAnoECAEQBA&biw=1280&bih=689&dpr=1&safe=active&ssui=on#imgrc=6sFkAhsO4rx2cM
