Su mesi de austu est sempiri cussu de is ferias, massimamenti in custas dis de mesaustu. Genti meda non si podit permitiri de andai aunia iat a bolli, su dinari est pagu e su perigulu de sa pesta mannu. Chini abarrat in domu e chini, invecias, comenti is politigus chi cumandant cicat de si pasai a pereula. Aunia s’ant agatai is politigus? Si ddu ant podiri permitiri?
Su presidenti de sa Repubblica Sergiu Mattarella at scioberau un’atra borta sa Sardigna po si pasai, ma, a pustis annus meda passaus in La Maddalena, in custu mesi de austu de su 2021 s’agatat in Salighera.
In s’Isula est torrau fias su capu de Forza Italia Sirviu Berlusconi, de triulas in Villa Certosa cun figlius e nebodis, in Porto Rotondo. A cantu si scit, finas Beppe Grillo at a erribai in Sardigna in sa domu chi tenit in sa Costa Smeralda.
Su presidenti de su Guvernu Mariu Draghi est in sa domu chi tenit in Città della Pieve in sa provincia de Perugia, cuasi in sa lacana cun sa Toscana. Innoi est probabili chi si frimit finas a mesaustu, comenti est sussediu in su tempus passau. De prus o mancu cunidixi annus Draghi at scioberau custa bidda de 7.600 abitantis po si pasai de su trabagliu. Forsis, a pustis mesaustu, at essi in Veneto.
Ferias italianas, in su meridioni, po Luisu Di Maio, chi eriseru fut cun sa sposa Virginia Saba in is Isulas Tremiti a innanti de torrai in su Gargano.
Giorgia Meloni, chi calencuna cida a oi dda iant bida in Forte dei Marmi, scioberat mari e familia e Mateu Salvini, a pustis calencuna dì passada in Milano Marittima, torrat po mesaustu, comenti de ocannu passau, in Calabria, chena dd’acabai, a dogna manera, de atobiai genti po trabagliu.
Erricu Letta, su segretariu de su Partidu Democratigu, est in sa citadi sua de Pisa e Giusepu Conte, chi fait is annus in custas dis, s’agatat in San Giovanni Rotondo.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://narrabondo.com/2020/07/06/cittadellapieve-cosa-vedere/
