In su 2020 in Italia is amelessus a sindigus, assessoris, consiglieris comunalis e municipalis funt stetius 465. Est custu su numuru de su studiu chi at fatu Avviso Publico titolau “Amministratori sotto tiro”. Sa media est cussa de noi amelessus a sa cida e una dogna 19 oras.
Sa Sardigna, a dolu mannu, in custa classifica, trista de averas, est sa de cincu cun bintunu amelessus.
Otantanoi funt is provincias cun amelessus in totu Italia, est su numuru prus artu de is urtimus dexi annus e po su cuartu annu de sighiu est sa Campania a tenni is numurus prus artus de totus: otantacincu. De arregodai ca s’annu a innantis funt norantadus. A pustis sa Campania erribant paris sa Puglia e sa Sicilia cun cincuantacincu amelessus, innoi puru, a castiai sa tassa mesu presa, funt calaus castiendu su 2019. In calada funt is amelessus finas in Calabria, chi est in cuarta positzioni, ca passat de cincuantatres a trintotu casus.
Sa Lombardia, comenti in su 2019, est sa regioni de s’Italia de sus chi erribat a innantis de is atras e est sighia de su Lazio. Is figuras pigadas de mira funt cuasi sempri is amministradoris de is citadis e biddas: is sindigus su 63%, is consiglieris comunalis su 23%, is assessoris s’8%, is “vice” sindigus su 5%.
Funt crescendu finas is amelessus a is amministradoris regionalis e massimamenti presidentis de Regioni, comenti est sussediu a Christian Solinas de sa Sardigna, Atiliu Fontana de sa Lombardia, Albertu Cirio de su Piemonti, Giuanni Toti de sa Liguria, Luca Zaia de su Veneto, Stevini Bonaccini de sa Emilia-Romagna e Nello Musumeci de sa Sicilia.
Donendu una mirada a is numurus sardus agataus ca de su 2011 a su 2020 funt 368 is amelessus a is amministradoris, cun sa provincia de Nugoro chi dda fait de meri cun 116 avertimentus, sighint is provincias de Casteddu e Tatari cun setanta e norantanoi, su Sud Sardigna cun sessantanoi e cussa de Aristanis cun trintanoi.
Màuru Mura
Foto: https://www.comune.casalgrande.re.it/2021/03/il-vademecum-di-avviso-pubblico-contro-lusura/
