Su Casteddu s’aprontat po sa partida de sabudu, a is ses de merì, in Firenze, in su campu de sa Fiorentina chi de una pariga de cidas est bessendu a foras po non ci calai in serie B. A pustis unu cumentzu de campionau chi at spantau a totus, ca po una bona pariga de mesis non binciant mancu a fustigu, is piciocus de Vanoli, chi at pigau su postu de Stevini Pioli, s’agatant immoi a cincu puntus de is casteddaius, a su costau de su Lecce.
Ambas is scudras lompint a custa partida a pustis de duas vitorias: cussa de Pisacane at bintu contras de sa Juventus in sa partida de sabudu passau, e cussa de Paulu Vanoli, invecias, in Bologna contras de is piciocus de Pissenti Italiano. Vitoria de is toscanus chi est serbia po arregodai finas su presidenti Rocco Comisso, mortu sa cida passada in New York.
Fabiu Pisacane, s’allenadori de is sardus, at a tenni a disponimentu dus giogadoris in prus: Dossena, lompiu de su Como, e Sulemana, erribau de s’Atalanta. S’atra dì is dus giogadoris nous, chi in tempus passau iant giai giogau cun su Casteddu, ant uficializau su totu e giai eris a mengianu ant trabbagliau, po sa borta de unu, cun s’orrestu de is cumpangius a is cumandus de su matessi allenadori. Funt lompius giai prontus e Pisacane ddus at a portai in Firenze po sa partida in su stadiu intregau a Artemiu Franchi.
De s’orrestu de is giogadoris s’est torrau a biri Zappa, chi at tentu problemas chi dd’ant custrintu a sartai sa partida cun sa Juventus. Ancora frimus Deiola e Folorunsho, chi de sa cida ch’intrant ant a torrai a s’allenai cun is cumpangius.
S’arbitru de sa partida de Firenze at essi Marcu Guida de sa setzioni de Torre Annuntziata: agiudau de Bindoni e Colarossi.
