Naraus ca custu cumentzu de annu nou po su Casteddu est totu un’atra cosa. Partida perdia, ma giogada cun gana e cun barra, cussa cun sa Roma de eriseru, chi fait tenni fidi po su benidori de su campionau.

A pustis duas vitorias de sighiu, cun sa Sampdoria e su Bologna, su Casteddu perdit in Roma contras de sa scuadra de Mourinho, chi est pagu cosa de averas. A decidiri sa partida est unu rigori de Sergio Oliveira.

Po sa cuntierra de s’Olimpicu, Mazzarri, chi no at possiu fairi giogai is impestaus de su Covid, Lovato, Bellanova, Grassi, Aresti e Oliva, in prus de Keita chi est gioghendu sa Copa de s’Africa e Ceppitelli chi est strupiau, fait cumentzai sa partida a Goldaniga, chi est lompiu s’atra dì. Cumentzant sa partida custus piciocus: Cragno, Zappa, Altare, Goldaniga, Carboni, Marin, Deiola, Dalbert, Pereiro, Joao Pedro, Pavoletti.

Arrespundit s’allenadori portoghesu de sa Roma cun Rui Patricio, Maitland-Niles, Mancini, Kumbulla, Vina, Sergio Oliveira, Mkhitaryan, Veretout, Zaniolo, Felix Afena-Gyan, Abraham.

Su gol de sa Roma erribat a pustis mesora de giogu, po mori ca Dalbert chi boddit sa bocia cun d’unu brassu. De is undigi metrus Sergio Oliveira segnat.

De tandu su Casteddu at provau a torrai a ponni a postu sa partida e at tentu, candu fut acabendu, un’ocasioni de oru: Joao Pedro tirat de acanta e su portieri de sa Roma Rui Patricio tocat sa bocia contras sa traversa. Lastima manna poita is sardus non iant airi furau nudda.

Mazzarri carignat su Casteddu e si dda pigat contras de s’arbitru Maggioni: “Eus giogau una grandu partida. Cumprendu ca po un’arbitru giovunu no est facili in d’unu stadiu mannu comenti de s’Olimpicu, ma non si podint donai aici medas punitzionis a s’imbessi. Meritiau sonumancu unu puntu, ma forsis finas tres ca sa partida in su segundu tempus dda eus fata nosu. Est de tres o cuatru partidas chi seus biendu unu fubal mudau de sa scuadra. Iaus preparau beni sa partida cun sa Roma e est lastima a ndi torrai in Sardigna cun is manus sbuidas. Imoi inderetura conca a sa Fiorentina”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto:https://www.google.com/search?q=roma%20cagliari%20youtube&tbm=isch&tbs=qdr:d&hl=it&sa=X&ved=0CAIQpwVqFwoTCMjGmoetuPUCFQAAAAAdAAAAABAC&biw=1263&bih=689&safe=active&ssui=on#imgrc=M845fHbqnLzh5M