Chi su campionau de Serie A de ocannu iat essi acabbau oi, su Casteddu fut sarvu. Su Parma invecias nou e a pustis essiri bessiu, in su mesi de làmpadas passau de sa Serie B, oi ci iat essi torrau a calai in su matessi campionau. Est po cussu chi sa scuadra emiliana at decidiu de mudai s’allenadori. Difatis, dapoi de sa partida perdia dominigu passau contras de sa Roma de Ranieri po 1-0 in Parma etotu, sa sociedadi c’at stupau a Fabiu Pecchia. Unu sceberu chi lompit in seus a cuatru partidas perdias una in fatu de s’atra, cumentzendu de cussa contras de su Milan su 26 de gennargiu candu sa scuadra de Pecchia si fut agatada a binciri po 1-2 finas a su minutu de norantadus po, in segus, perdiri in tres minutus 3-2 (Cancellieri e Delprato iant fatu gol po su Parma e Pulisic, Rejinders e Chukwueze po su Milan). A pustis at perdiu in Parma cun su Lecce po 1-3, in Casteddu cun is orrubius-asulus po 2-1 (spantosu su gol de Coman po su Casteddu) e, comenti eus arregodau a innantis, dominigu passau cun sa Roma cun su gol de Soulè.
Ancora de cumprendiri chini at a pigai su postu de Pecchia, ma sa dirigentzia at giai fatu connosciri su sceberu de mudai. Pecchia fut lompiu in Parma in su mesi de làmpadas de su 2022, in su campionau de unu fut erribau finas a is Playoff de Serie B e su matessi Ranieri, candu fut allenadori de su Casteddu, ddu iat bintu in sa partida a innantis de sa finali po ci bessiri in Serie A. In segus, in su campionau 2023-2024, ce dda iat fata a torrai a portai su Parma in Serie A e immoi, a pustis binticincu partidas, stupau chena farta. Po s’ora is emilianus s’agatant a binti puntus chi funt lompius cun cuatru partidas bintas, s’urtima su 28 de Mesi de Idas cun su Monza po 2-1, e otu paregiadas. Ma funt is trexi partids perdias chi ant arriolau is dirigentis.
Màuru Mura
Martis, su dixiotu de friargiu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.calcionapoli24.it/serie_a/parma-arriva-l-esonero-per-fabio-pecchia-cambio-panchina-in-serie-a-n636520.html
