Datzius a su 100% a sa Russia chena unu acordiu de pagi in pissu de s’Ucraina a intru de cincuanta dis. Ddu at nau Donald Trump, chistionendu in sa Domu Arva, cun a su costau su segretariu generali de sa Nato Mark Rutte.
Fueddus chi s’aspetaiant, cussus de su presidenti de is Stadus Unidus: “Soi deludiu de Putin, poita pensaìa de agatai un’acordiu giai de dus mesis a oi, ma parit ca non ddi bolit bessiri a pigliu. Chi non s’at agatai a intru de cincuanta dis, est facili meda: is datzius ant a lompiri a su 100%”. Trump at finas nau ca is datzius ant a cresciri po is Natzionis amigas de Mosca.
Sempiri su presidenti de is Stadus Unidus, no at arrespustu a sa pregunta poita at donau tempus mannu de cincuanta dis e at nau custus fueddus: “Custa no est sa guerra mia, est sa guerra de Biden e cun mei non iat essi mai cumentzada”.
“Pensu chi s’at a lompiri a sa pagi, Putin connoscit eita est un’acordiu giustu”, at sighiu Trump chi a sa pregunta chi su presidenti russu est unu bocidori, comenti iat nau su presidenti beciu de is Stadus Unidus Joe Biden, at nau: “Non bogliu nai ca Putin est unu bocidori, ma est de seguru unu meda tostau”.
“Tochit chi pighit in manera prus seria is fueddus de Trump”, at nau, invecias, Rutte. “Chi fui che Putin e tui ddi fust chistionendu, iat a pensai de torrai a pigai in idea manna s’acordiu de pagi”, at sighiu a nai su segretariu generali de sa Nato.
Po cantu pertocat is armas: “Eus fatu oi un’acordiu cun sa Nato. Eus a sighiri a mandai armas a s’Ucraina, ma is Stadus Unidus non ant a pagai nudda. Nosu dda fabricaus e is europeus ant a pagai, ponendu su dinari chi abbisongiat”, at acabbau de nai Rutte.
“Non boleus spendiri totu su dinari nostu, non ddu podeus prus fairi”, at aciuntu, a s’acabbu Donald Trump. Cantu ant a addurai is fueddus de Trump, custa bia?
Màuru Mura
Mercuris su seixi de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.gettyimages.it/editorial-images/news/event/president-trump-meets-with-nato-secretary-general-rutte-at-the-white-house/776356470?editorialproducts=all
