Chistioni de tempus pagu, assegurant in is aposentus de su “Campu largu”. Sa Giunta de sa presidenti Alissandra Todde est in pratiga giai pronta, su circu est acanta de si serrai: in custu acabbu de cida is atobius ant a ponni a un’ala is urtimus nus. Chi funt, massiamenti cussus de nominis pagus, prus che a totu cussu de is feminas chi depint imbucai. E, de seguru, comenti impromintiu, martis, su noi de arbili at essi totu aprontau. Est giai custu unu spantu chi pensaus feti a cussu chi fut sussediu cun sa giunta de su presidenti Christian Solinas cincu annus a oi.
Duncas intru de cras e pusti totu at essi acrariu, poita calencuna delega ancora girat de una parti a s’atra.
Parteus cun cussas chi funt cuasi una seguresa. A su Partidu Democratigu andant su Bilanciu, cun Giusepu Meloni chi at essi finas su numuru dus de sa Giunta, Ambienti cun Mateu Muntoni, e Industria cun Emanueli Cani. Abarrat calencuna duda poita mancat s’indicu de is democratigus po nominis de feminas. A is Steddaus de sa presidenti andant sa Sanidadi, cun s’indicu de unu tecnicu e politigu, e su Trabbagliu cun Desirèe Manca. Antoni Piu de Avs a is Trabbaglius pubricus, Francu Cuccureddu de Orizonti Cumunu a su Turismu.
In segus tocat a imbucai in su caminu de is pensadas. Urbanistica e Trasportus iant depiri essiri in sa “cuota Todde, est a nai ca at essi issa a decidiri, e si pensat ca ant essi nominis tecnicus e non politigus. A is Progressistas iant depiri andai s’Agricoltura cun Giuanni Francu Satta, in su mentris chi sa lista “Unius po Todde” iant depiri donai una femina po s’assessorau de is Afairis Generalis. Sa Cultura andat po sa Manca Benienti e si fait su nomini de Giuliana Altea.
A su Partidu Democratigu iat depiri andai finas sa presidentzia de su Consigliu Regionali e po cantu bessit a foras su nomini prus forti est cussu de Pieru Comandini.
Màuru Mura
Sabudu, su ses de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://indip.it/no-il-consiglio-regionale-non-ha-ripristinato-i-vitalizi/
