In is messagius de Igor Sollai, po cussu chi pensat su pubricu ministeru Marcu Cocco, s’agatat s’arregioni po sa cali apat bòciu sa pobidda Francisca Deidda, in Santu Sparau, uania biviant, a corpus de marteddu a conca su dexi de maju de ocannu passau. A pustis una pariga de mesis, in cussu de argiolas, su corpu de sa picioca ddu ant agatau serrau a intru de unu borsoni in is orus de su caminu de s’Orientali sarda. Intru de su sartu de Sinnia e Santu Idu.
Fut su tres de gennargiu de su 2024, e su camionista chi, dapoi de tempus, at amitiu de airi bòciu sa pobidda, naraiat a sa picioca cun sa cali triaigiat a Francisca: “At cumprendiu ca deu tengiu un’atra e mancu aici mi ponit a un’ala. Scis ca pobiddu tuu tenit un’atra, est seguru, mudat is abitudis suas de una dì a un’atra epuru bis ca issa non pigat peruna decisioni… Duncas po cussu chi apu cumprendiu mi depu moviri deu in dd’una atra manera”.
Su trinta de gennargiu Igor Sollai pedit a unu parenti chi ddi podit comporai su cianuru, in su mentris chi su dus de maju, messagendu cun sa matessi picioca, narat ca “si iat podiri serrai a intru de s’acabbu de custu mesi”. Forsis, comenti pensant is indagadoris, fut chistionendu de sa separatzioni, sonumancu creint sempiri is indagadoris.
Duas dis a innantis de su bocidorgiu, Sollai narat a sa picioca: “Podeus aprontai unu fini de cida paris”. E, sempiri s’otu de maju, cicat in Google “Comenti atacai unu corpu” e “sa manera prus lestra de fairi sparessiri unu corpu”. E ancora, atras cicas comenti fairi a si ponni a su postu de Francisca po lassai, cun dd’una mail, su trabbagliu.
Francisca est morta a is noi oras de su de dexi de maju, a is dexi e trintadus minutus Sollai iat essi bessiu cun su corpu a intru de unu borsoni. A mesunoti mancu unu cuartu Sollai lamat s’amanti. E a innantis ddi iat airi scritu: “DD’apu lassada”. Invecias dda iat bòcia.
Màuru Mura
Lunis, su dexi de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ansa.it/sito/notizie/cronaca/2024/07/24/donna-scomparsa-da-maggio-marito-resta-in-carcere_e3e99dc1-4d5a-4ec4-ab73-b15a7519722c.html
