“Adiosu Francisca”, “Is collegas tuus”. Pagus fueddus chi acumpangiant una pintada de unu frori in colora de orrosa.
Custus fueddus funt in dd’una pagina de s’Unioni Sarda eris e sa matessi pagina est stetia comporada de is trabbagliodoris de su Call center Call2Net, su matessi aunia trabbagliaiat Francisca Deidda, sparessia in su mesi de maju passau e de sa cali ant agatau is orrestus funt stetius agataus a pustis cidas medas a intru de una borsa cuada intru de su caminu de s’Orientali becia, in is orus de Santu Pilimu.
S’indagu est partiu propiu de cussu call center candu, est lompia una litara eletronica. aunia Francisca naraiat de non bolliri trabbagliai prus. Nemus si dd’aspetaiat e totus si furint spantaus. Difatis is collegas de Francisca ant tentu inderetura prus de una duda e ant cicau de fueddai cun sa picioca sparessia. Ma is arrespustas lompiant feti in Whatsapp.
Aici, is amigas de Francisca, ant trogau unu pagheddu cun is scritus in su telefoneddu. Una de custas, at scritu ca finas un’atra picioca iat decidiu de si dimitiri, ponendu unu nomini fartzu. E de su telefunu de Francisca ant scritu: “Mi dispragit e comenti mai?”
Cussa est stetia sa beridadi de is dudas, poita cussu nomini postu in su messagiu non s’agataiat in is trabbagliadoras de su call center. Francisca no iat airi arrespustu aici poita ddu sciat, invecias chini fut umperendu su telefunu non ddu podiat sciri.
De innoi su cumentzu de s’indagu, a pustis chi su fradi de Francisca, Andria Deidda, at presentau denuncia a sa giustissia. Po mori de totu is indagadoris ant acapiau su pobiddu, Igor Sollai. Chi, a dogna manera de su presoni de Uta sighit a nai ca issu non c’intrat nudda.
In su mentris su Ris de is carabineris ant cumpudau in sa domu de pobiddu e pobidda e parit ca in pissu de su divanu ddue ant agatau arrastas de sanguni, aici comenti in sa machina chi Sollai at bendiu.
Màuru Mura
Sabudu, su bintiseti de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://2017.gonews.it/2017/02/09/ris-reparto-investigazioni-scientifiche/
