Cumentzat oi in Instanbul atobiunous intru de is ucrainus e is russus. Su primu faci a faci in duas cidas. S’obietivu de importu prus mannu est cussu de dd’acabai cun su fogu o sonumancu un’acordiu in pissu de is agiudus a chini at perdiu totu si fuit. “Non seus bendendu gneti, terras o sovranidadi”, at nau po custu su ministru de is Esterus Dmytro Kuleba. Calencuna duda po chi totu andit beni ddu ponit unu chi contat meda in su “Dipartimento di Stato” de is Stadus Unidus chi a parrer su Putin non tenit peruna gana de torrai in segus po dd’acabai cun sa guerra.

In Instabul, po cussu chi narat sa Tass, si ddue agatat finas Roman Abramovich. In is oras passadas su sindigu de Melitopol, Ivan Fedorov, at fatu sciri ca is sordaus russus ant liau una femina chi fait parti de s uConsigliu comunali de sa citadi. Su matessi sindigu ddu iant liau a s ucumentzu de martzu e in segus torrau a lassai a pustis una pariga de cidas. Sa consigliera iat essi Iryna Shcherback, capu de su dipartimentu de s’istrutzioni de su Consigliu.

De s’Onu bolint cumentzai un’indagu beni fatu poi s torturas chi funt fendu a is presoneris de gherra. “Eus bistu videus de presoneris russus pigaus de is ucrainus e a s’ambessi puru”, at nau su capu de sa Missionichi donat una mirada a is diritus umanus de s’Onu Matilda Bogner, aciungendu chi s’Onu est cumentzendu a castiai totu su materiali chi s’agatat.

De su Cremlino faint sciri, po bogi de Dmtry Peskov, ca chini umperat torturas at a pagai e po cantu pertocant is armas nuclearis at torrau a nai ca Putin no “at mai amelessau o pentzau de ddas umperai”.

In su mentris Joe Biden at torrau a chistionai de su presidenti russu: “Unu ditadori chi at decidiu de torrai a fraigai unu imperu chi no at mai ponni a un’ala s’amori de sa genti po sa libertadi. Su mali chi est fendu no at a ponni mai a una parti sa volontadi de libertadi. S’Ucraina non at essi mai una vitoria po sa Russia”. Ddu at scritu in Twitter umperendu s’account cosa sua e non cussu uficiali.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://it.wikipedia.org/wiki/Istanbul