Teniat unu progetu in conca, Fiorenzo Serra, una de cussas pensadas chi nascint feti de sa passioni manna chi unu tenit po su trabagliu e po su cinema massimamenti, ma finas de su disigliu chi teniat de si torrai a biviri un’opera manna, fata in is annus sessanta, po di donai un’atru bestiri, errichendudedda de atras cosas e umperendu is tecnologias chi, a pustis, funt bessias.
Su documentarista sardu si boliat ponni, un’atra borta, a trabagliai a “L’ultimo pugno di terra”, film nasciu “comenti agiudu intelletuali a su primu Piano di Rinascita”, cun sa collaboratzioni de atrus intelletualis mannus chi sa Sardigna at tentu: Antoni Pigliatu, Emilio Lussu, Manlio Brigaglia, Pepinu Fiori, Mialinu Pira, Sarbadori Mannuzzu, Luca Pinna, ghiaus de s’ogu de Cesare Zavattini. Serra s’est mortu a otantacuatr’annus, a innanti de arrennesciri in custa pensada. Fut prontu a lompiri in Roma e si serrai in d’unu aposentu de montagiu po torrai a trabagliai a cussu film chi, in su 1966, dd’iat fatu binciri su premiu Agis in su Festival dei Popoli di Firenze, chi fut una de is prus importantis de su tempus.
Sa Sardigna, cun Serra, perdit un’omini mannu ca, in is annus cincuanta e sessanta, fut stetiu capassu de fairi biri, cun is trabalius sus, comenti sa Sardigna fut mudendu.
Su regista fut nasciu in Porto Torres in su 1921 e iat studiau in s’Universidadi de Firenze. Naraiat sempiri de airi imparau a sa sola a fairi cinema e propriu in Firenze iat fatu is primus trabaglius, comenti sa “Barca sul fiume”. In Sardigna fut torrau in su 1945 e, a pustis calencunu annu de trabagliu in s’Universidadi, iat decidiu de fairi feti cinema. De su 1949 a su 1982 at fatu cincuantotu trabaglius, cuasi totus intregaus a is traditzionis de s’Isula. Arregodaus is prus famaus: “Alba sulla Nurra”, “San Costantino”, in pissu de s’Ardia de Sedilo, “Nei pressi dell’argilla, in pissu de su Campidanu de Aristanis, “Fame di pietre”, in pissu de is caminus nous in is zonas bonificadas de sa provincia de Casteddu, “Artigiani della creta”, in pissu de is artigianus chi trabagliant s’arghidda, “Desulo”.
Meda de custus trabaglius ant bidu s’agiudu in dinari de sa Regioni o de atrus entis comenti s’Etfas, ma Serra no at fatu intrai mai a nemus in cussu chi teniat de nai.
Est sussediu finas po “L’Ultimo pugno di terra” pediu de s’Assessorau a sa Programatzioni, chi “boliat unu documentariu celebrativu de su primu Piano di Rinascita”, at contau Serra in d’una ciaciarrada cun Gianni Olla: “Sa proposta mia fut stetia, invecias, cussa de ‘frimai su tempus’ cun su cinema, de pensai a fundu in pissu de sa memoria sarda, a innantis de cumentzai is mudamentus”.
Su regista iat cumentzau a girai in su 1960 e in su 1964 su film ddu at presentau, a sa Giunta Regionali de tandu, in su cinema Fiamma. “Su presidenti de sa Giunta Corrias – arregodaiat Serra – s’est acostiau a mei po mi nai: m’est pragia meda sa calidadi tecnica, ma in pissu de cussu chi at fatu nai tocat a ndi torrai a chistionai.
Pariat arrennegau meda, non po is imaginis, ma comenti ddu ia pensau deu, ca ponia sempiri dudas: faia biri is mudamentus ma chena meda spera e fidi”
Dudas chi boliant fairi beni a sa Sardigna, eriseru comenti oi. Erra in su 1968 diventat presidi de s’Istituto d’Arte de Nugoro, apena nasciu, e in su 1973 in cussu de Salighera.
A issu est intregau su Film Festival Fiorenzo Serra de Tatari.
Màuru Mura (bortau in sardu de https://www.facebook.com/ornellademuru)
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.facebook.com/ainnantis/photos/pcb.1005180713663173/1005178650330046/
