Est mortu in su noti, a s’idadi de norantanoi annus, Arrafieli La Capria, scritori divenniu in su tempus unu puntu de riferimentu po giovunus meda chi ddu ant pigau comenti de indicu po sa formaztioni e scioberus leterarius.

Custu, massimamenti, po essiri lompiu a cust’idadi cun su ciorbeddu sempiri atentu, ma finas po su caminu intelletuali e artisticu, ca est passau de essiri narradori a sagista e dunca in aforista curiosu.

De tempus biviat in Roma, ma teniat Napoli in su coru: is operas suas teniant Napoli sempiri presenti. In su 1961 at bintu su “Premio Strega” cun “Ferito a morte “ e si podit nai ca est stetiu unu de is scritoris prus famaus de sa leteratura italiana in sa segunda parti de su noixentus. “Ferito a morte” est de fatu sighiu in su primu libru chi iat scritu “Un giorno d’impazienza” de su 1952 e cun s’atru “Amore e psiche” de su 1973. Totu paris in “Tre romanzi di una giornata” de su 1982.

“Si funt mudadas is partis: una borta funt is becius a fairi de garanti po is giovunus, oi sussedis s’imbessi e mi parit una cos bona, una manera po non segai cussa cadena chi acapiat is generatzionis e faint sa vitalidadi de una cultura” ddi pragiat a nai, propriu issu chi de candu teniat corant’annus, in su tempus de bessida de “Ferito a morte”, si fut agatau contras meda de is nominis de prus importu mannu  leterariu. Invecias sa genti prus acanta a s’idadi sua, is prus giovunus a ddu sustenni, massimamenti o sa novidadi manna de sa manera de scriri. De fatu de su “Premio Strega” in is matessis annus est lompiu finas il “Leone d’oro” in Venetzia po sa scenegiadura de “Mani sulla città” de s’amigu Franciscu Rosi, finas custu unu contu de denuntzia.

Nasciu s’otu de Santu Ainde de su 1922, Arrafiaeli La Capria a pustis airi pigau sa laurea in Leis in s’Universidadi de Napoli in su 1947 e de fatu airi biviu in Francia, Inghilterra e Stadus Unidus, in su 1950 lompit in Roma.

In su 2005, a pustis is premius Strega ddi funt erribaus atrus premius comenti su Premio Viareggio po sa regorta “L’Estro Quotidiano”, a pustis airi pigau su Premio Campiello in su 2001 e su Premiiu Chiar in su 2002.

 

 

28 de làmpadas de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.rainews.it/articoli/2022/06/la-capria-morto-raffaele-scrittore-99-anni-0f77aa63-2736-4f38-9b5d-b7d1d45ca4fb.html