Su premier ingresu Boris Johnson at fatu is scusas a su parlamentu po mori de una festa acapiada a un’atobiu aprontau in Downing Street in su mesi de maju de su 2020 candu totu s’Inghilterra fut incungiada in domu, comenti naranta is regulas po binciri su Covid. At arreconnotu ca sa genti tenit arregioni a s’inchietai, ma at finas nau ca no at fatu nudda po andai contras is regulas.
Est beru ca ddue fut e ddu est abarrau po una mesoredda, po “torrai gratzias a su personali: “Creia ca fut un’atobiu de trabagliu”, at aciuntu.
Ma “cun s’arregioni depia portai totus a intru e iari depiu agatai un’atra manera po ddis torrai gratzias. Depia finas cumprendiri ca genti meda non dda iant airi bida a cussa manera”. Johnson at arregodau ca Downing Street benit umperau, cun su giardinu, comenti unu logu de trabagliu, imoi prus de a innantis ca po binciri sa pesta est meglius a abarrai in logu foras e non a si serrai a intru.
Is nemigus politicus de Boris Johnson, massimamenti su capu de is laburistas Keir Starmer, ddu ant cumbidau a si nd’andai nendu puru ca is scusas “non tenint perunu valori”. Ddu incurpant de airi nau faulas a su parlamentu e a totu is inglesus. “Lassa perdiri e baidindi” at aciuntu Starmer “est sa cosa prus digna chi podis fairi. Ses chena bregungia e ses andau contras is regulas e sa lei”.
Non feti is laburistas iant a bolli chi Johnson si dimitat, ma finas totu is atrus partidus de opositzioni, prus de totus is indipendentistas scotzesus de su Snp. Ian Blackford at umperau fueddus grais e dostaus nendu ca su “premier” ingresu at amostau “dispretziu” po sa genti ingresa e po totu su parlamentu e at cumbidau is atrus deputaus de sa magiorantzia a nde ddi tiria sa fiducia.
Po Johnson non si ndi chistionat nemancu: “Sciu de airi faddiu, ma abarru ca tengiu ancora meda de fairi”.
13 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.open.online/2022/01/11/covid-19-regno-unito-partygate-johnson/
