Genti de contai a migliaias, custu mengianu, si funt agataus in sa cresia de Santa Maria degli Angeli, in Roma, po saludai po s’urtima borta David Sassoli, su giornalista e presidenti de su Parlamentu Europeu mortu in su noti de lunis passau. Totus ant sighiu is regulas po cumbatiri sa pesta, ca feti aici faiat a ddue essi. Is prus artas carrigas de su Stadu e de is diplomatzias de totu Europa, is collegas de sa politiga e de su mundu de is giornalistas ant atobiau a cresia, ma cussu chi at spantau de prus est sa genti cumuna, comenti a nai ca Sassoli fut omini bofiu beni meda.
Sa machina cun su baulu, cun sa bandela de s’Europa, de Sassoli est partia de su Campidogliu, aunia eriseru ddu ant saludau in medas, candu est erribada a cresia dd’ant saludada batendu is manus.
“Unu esempiu po totu is politigus” at nau su cardinali Gualtiero Bassetti, presidenti de sa Cei, “in medas ddu intendiant comenti unu de nosu”, is fueddus durcis de s’atru cardinali, Zuppi, chi at fatu sa missa.
Po su interru de Stadu, comenti ant decidiu po saludai su gionalista famau, a innantis is onoris militaris e a pustis sa missa de prus de un’ora.
Tra is atrus ddue funt is presidentis de su Senau Casellati e cussu de sa Camera Fico, su presidenti de su Consigliu Mariu Draghi, ministrus, deputaus e senadoris, su guvernadori de sa Banca de s’Italia Visco. E galu sa presidenti de sa Cumissioni Ue Ursula Von der Leyen, su presidenti de su Consigliu Ue Charles michel, sa numuru dus de su Parlamentu Europeu Metsola, atrus funtzionarius europeu e su presidenti de sa Spagna Sanchez.
Non totus funt possius intrai in cresia, ca logu no ddue nd’iat. Chini est abarrau in foras at possiu sighiri totu su matessi ca sa Comuna de Roma at postu dus “maxi schermo”.
Adiosu David Sassoli, chi sa terra ti siat lebia…
14 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.rainews.it/articoli/2022/01/lultimo-saluto-a-david-sassoli-funerali-di-stato-per-il-presidente-del-parlamento-europeo-325f04c5-8fa1-4355-8d29-05425417b608.html
