Nudda de nou in s’atobiu, no in presentzia, de is rapresentantis de is ucrainus e de is russus. “Seus atesu meda po unu acordiu castiendu cussu chi est sussedendu”, ant fatu sciri su ministru de is esterus de Kiev Dmytro Kuleba, intendiu de sa Cnn.

“Ci funt problemas – at nau su ministru – chi faint sa diferentzia manna in cussu chi tentint in conca is russus. Su de unu, de custus problemas, est ca non s’aspetaiant chi is sordaus e sa genti nosta non si funt arrendius comenti issus boliant. Sa de duas funt is santzionis postas de totu s’orrestu de su mundu a is russus chi funt fendu sunfriri meda s’economia insoru. Po custu sa Russia s’agatat custrinta a mudai is pensadas”.

“Non sciu chi nai chi est meglius o peus – at sighiu a nai Kuleba – ma, bistu cussu chi est sighendu a sussediri, pensu chi dogna borta si podit fraigai un’acordiu. Issus cumentzant cun is amelessus, ca chi poneus totu paris, funt feti unu cumbidu a nos arrendiri e custu non ddu podeus acetai mai”.

Fueddus chi boliant, a innanti de totu, ponni a un’ala cussu chi iat nau su Financial Times, chi fueddaiat de un’acordiu agatau in cuindixi puntus.

In su fratempus sighint is bombas in pissu de is citadis ucrainas: in Kiev, in sa zona de Darnytsyi, biora de is cincu de cutu mengianu, ant boddiu unu palatzu, lassendu unu mortu e tres lantiaus. Atrus trinta ddus ant portaus de atras partis.

Po cussu chi pertocat s’atacu de s’atra dì in su tiatru de Mariupol aunia ddue fut genti comuna e non sordaus (prus o mancu cincuxentus po cussu chi narat Human Right Watch), c’est s’arriolu mannu po cussu chi podiat essiri sa pensada russa in d’una citadi chi de tempus est posta a sufferentzia manna e chena lugi, abba, telefunus.

De su satelliti si bint duas scritas a mannu: una est “pipius” e s’atra “genti cumuna”.

De su cumentzu de s’intrada russa in Ucraina, po cussu chi narat su presidenti Zelenky, is pipius mortus funt centu e tres.

 

 

17 de martzu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.money.it/Accordo-di-pace-Ucraina-e-Russia-cosi-potrebbe-finire-la-guerra