Est mortu a norantadus annus Tito Stagno, faci connota meda de sa Rai e famadu ateretantu po airi contau s’erribu de s’omini in sa Luna in su merì de su 20 de orgiolas de su 1969. Fut nasciu in Casteddu in su 1930 e at cumentzau a trababliai in s’arradiu de piciocu piticu: a dixianoi annus. Bincit su cuncursu de telecronista in su 1954 paris a Frurio Colombo, Giuanni Vattimo e Umberto Eco. Su primu trabagliu mannu, sempiri comenti de bogi, est po is “Giochi olimpici invernali” de Cortina d’Ampezzo. Po tempus meda est abarrau comenti de responsabili de su sport de sa Rai pighendu in imperiu sa Domenica Sportiva chi at ghiau, cun s’agiudu de Beppe Viola, Adrianu De Zan, Giuanni Pieru Galeazzi, e Paulu Rosi, de su 1979 a su 1981 e in segus in is annus 1985-86.

Tito Stagno at tentu sa fortuna manna de airi biviu su contu de s’omini chi erribat in sa Luna po sa prima borta, ma ddu at fatu chena aboginai meda, comenti faint atrus in sa televisioni in custus tempus. Po chini tenit gana de si torrai a castiai is filmaus podit agatai unu Stagno seguru, allirgu, ma finas emotzionau meda. Funt atrus tempus e forsis is italianus puru s’allirgaiant de cosas chi in su benidori si funt possias biri in prus de una ocasioni.

Non feti de Luna at biviu Tito Stagno, ma de dognunu chi at trabagliau cun issu est arregodau comenti de unu Maistu. De arregodai is intervistas de importu mannu e is relatas in pissu de is viagius de su Paba Pàulu VI in Palestina e John Fitzgerald Kennedy in Italia.

A pustis at postu prus atentzioni a su mundu de su sport, massimamenti de su fubal. Finas in custu mundu, aunia s’aboginat in donnia, Stagno at poderau sa seguresa e sa trancuillidadi, comenti scint fairi in Ominis Mannus e is signoris.

Un’atru mundu, ma seus segurus ca finas in custu unu comenti Tito Stagno si podiat fairi connosciri e bolliri beni.

 

 

Màuru Mura

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.open.online/2022/02/01/roma-tito-stagno-morto-video/