Est lompiu, comenti iant nau is espertus, su tempus legiu in Sardigna cun agitoriu de colori orrrubiu po totu sa dì de oi finas a sa mesunoti. In paricius logus bentu forti e abba a marigas chi ant giai fatu dannus cun caminus prenus de abba e matas betadas a terra. Medas funt is biddas aunia ant serrau is scolas e is parcus. Intru de is biddas prus postas mali agataus Bosa, cun orrugas medas prenas de abba e de ludu. Est orruta, in pissu de is machinas parchegiadas, finas una crobetura, ma nemus est abarrau lantiau. Su caminu po Montresta est serrau po is perdas mannas chi funt orrutas de su monti.

In Salighera su numuru dus de su sindigu at donau ordini de sa serrada de totu is scolas, is parcus de sa citadina e de su campusantu. Su matessi ant fatu in Guspini e in Arbus. E galu in Aristanis Terraba, Santu Nigola d’Arcidano, Arborea, Uras, Sobarussa, Bossa e Ales. Sa genti benit cumbidada a abarrai in domu e non bessiri in machina chi non po necessidadi urgenti.

In Torregrande matas e palus eletricus funt sciopaus a terra. Si movit sa protetzioni civili po cicai de libbertai is caminus de s’abba, ma su probelma est ca sighit a proiri e a trabbagliai aici est dificili meda. Su sighimentu de sa dì no at essi meglius ca is espertus chistionant de abba chi podit erribai finas a is centu millimetrus.

Po curpa de custu tempus malu, eris e oi puru, funt sartaus is collegamentus intru de sa Sardigna e sa Corsica. Su mari a fortza 8-9 est donendu a ita fairi e unu traghetu Delcomar est frimmu de eris intru Carloforte e Portovesme, finas chi in custa chistioni si podit viagiai intru de Carloforte e Calaseta.

Totu in regula, invecias, po is navis chi partint e lompint de Portotorres cun Genova.

Est sempiri aici, a pustis de un’istadi chi pariat non tenni acabbu, is primas abbas faint a timiri.

 

 

 

Màuru Mura

 

 

 

Martis, su 22 de Sant’Andria de su 2022

 

 

Foto: https://www.linkoristano.it/fotogallery/maltempo-in-sardegna/