Italianu est s’omini prus lestru de su mundu. Sa medaglia de oru binta de Marcell Jacobs in is centu metrus in 9”80 intrat in sa storia de su sport de s’Italia: mai perunu italianu, in centubinticincu annus de Olimpiadis, iat fatu parti de custa cursa in finali. “Non biu s’ora de intendiri s’innu de Mameli – at nau Jacobs – fut su bisu chi tenia de pipiu e apu postu, in sa cursa, totu cussu chi tenia a intru de mei”. Cun sa medaglia de oru de Jacobs est erribada cussa puru de su sartu in artu de Gianmarco Tamberi binta paris cun Essa Mutaz Barshim de su Qatar. “Ce dda eus fata, eus bintu is Olimpiadis a pustis annus dificilis meda po mei candu mi fui strupiau e pariat totu acabau. Gratzias a beru a totus cussus chi mi funt abarraus a su costau”, funt is fueddus de Tamberi.
Unu merì spantosu po s’Italia in Tokyo aunia Jacobs e Tamberi ant fatu bisai totu sa natzioni. Est acabada cun d’unu chi at aspetau s’atru po s’imbrassai a forti. Funt duas medaglias chi benint de contus diversus: Jacobs, giai in sa gara a innnanti de sa finali, iat fatu biri ca si podiat fairi beni meda, currendu in 9”84, chi est su record in Europa. Una borta chi at bintu at cicau Tamberi, po ddu imbrassai, ca iat bintu una pariga de minutus prima. Noti de festa po is dus campionis in su villagiu olimpicu aunia funt erribaus a is tres de mengianu. Candu ndi funt calaus de sa machina, chi ddus at acumpangiaus, totus ant cumentzau a batiri is manus e a aboginai. Imbrassaus de totus, massimamenti de is giogadoris de volley e de basket chi ant bofiu a si fairi tirai una fotografai paris. S’imbrassu prus a sa strinta cun Zaytsev, chini ddue fut at nau ca “stringiat su coru”.
Sa premiatzioni de is dus “orus” est oi, candu in Tokyo ant essi is seti de merì e in Italia, invecias mesudì. Po su sport de s’Italia est una manera de torrai a partiri, sa spera est chi sigat giai de Tokyo.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.tuttobiciweb.it/article/2021/07/20/1626774952/olimpiadi-tokyo-2020-calendario-orari-italiani
