Est erribada finas in Sardigna sa varianti sudafricana de su coronovirus e at impestau tres sardus de duas biddas de su Logudoro e un’atru chi bivit in su Tataresu. De custa varianti, est a nai, sa comunidadi scientifica scit pagu meda, ma tenit una seguresa manna: impestat de prus meda de su virus 1.0, cussu chi seus gherrendu de un’annu a-i custa parti. Picigat de prus, e assimbigliat a is variantis ingresas e brasiliana. Est de arregodai ca cuasi totu is sardus impestaus imoi tenint sa varianti ingresa.
Parit ca is tres sardus impestaus, comenti eus nau dus in su Logudoro e unu in su Tataresu, funt is solus po imoi a tenni custa varianti noa: “Forsis bolit nai ca s’Ats si nde acatada in tempus e at incungiau is tres, a innantis de atobiai atra genti”, at nau Salvatore Rubino, diretori de su Laboratoriu de Microbiologia e virologia de Tatari.
At aciuntu, dapoi, Rubino: “Non podeus negai chi teneus dudas mannas chi su vacinu, massimamenti s’AstraZeneca, possat fairi calencuna cosa po sa varianti sudafricana, parit ca serbit po non fairi amalaidai meda cussus cun su Covid-19, custu parit ca ddu facat. Sa beridadi est ca in pissu de sa varianti brasiliana e sudafricana non si funt fatus ancora studius chi bagliant”.
“De seuru seus arriolaus”, at invecias nau s’assessori regionali de sa Sanidadi, Màriu Nieddu, “ma custu non bolit nai ca seus disisperaus. Eus fatu indagus cun atentzioni manna in pissu de custus tres sardus impestaus de sa varianti sudafricana e po imoi, podeus nai, ca non ci funt atrus casus. Fut importanti a assolai custus tres, a innantis chi impestaiant atra genti e sa spera est a ce dd’airi fata”.
In su fratempus eriseru, in Sardigna, eus tentu atrus centucincuantanoi impestaus e atrus dus mortus. Po imoi, duncas, de friargiu de ocannu passau eus tentu 43.577 impestasu e 1.216 mortus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.vanityfair.it/benessere/salute-e-prevenzione/2021/01/22/covid-le-varianti-sudafricana-e-brasiliana-potrebbero-schivare-le-difese-immunitarie?refresh_ce=
