Cantas bortas intru de amigus nosi capitat de pigai unu gelau? Bortas medas ca su corpus e s’anima tenint abisongiu de cosas durcis! E cantas bortas, sempiri intru de amigus, nosi pregontaus cali est su gelau prus bonu in Sardigna? Sempiri bortas medas, totu dipendit de cussu chi agradat de prus a sa limba e a sa buca. Ma, po su Gambero Rosso, chi at premiau is butegas de gelaus meglius in Italia, in Sardigna funt duas is gelaterias chi minescint: I Fenu de Casteddu e “Dolci sfizi” de Macumere. Duncas chi bosi boleis papai su meglius gelau fatu in Sardigna tocat a andai in su Marghine o in sa capitali Sarda. Bonas novas funt custas, ca in Sardigna s’arti de fairi gelaus est sempiri stetia presenti.
In totu funt cincuantotu is premius donaus a is maistus de su gelau. Dognunu de custus at erriciu is “Tre coni”, chi est comenti sa medaglia de oru. Su premiu pertocat su 2020, in s’annu de sa pesta prus manna chi arregodeus, su gelau at fatu sa parti sua fendu beni a totus. Po is gelataius is afaris funt andaus beni, o meglius de cussus de atras butegas, in totu s’Italia, de susu a basciu.
A s’indagu de su Gambero Rosso at donau una manu de agiudu finas Orion, chi produsit vetrinas po is gelaterias. “De moda – si ligit in sa Guida – is saboris caramello e sali, saboris prenus pensaus po cuntentai sa buca. Is maistus ant cumprendiu ita pragit e ant trabagliau cun is saboris prus antigus, ddu ant fatu ponendu, cun abilidadi manna, i saboris primus e cussus chi agiudant, de su lati a su ciculate, de is pistocus a s nugedda, de su sali a is candidus, po unu gelau bonu e sanu”.
Est a nai ca “I Fenu” de Casteddu iant pigau su premiu finas in su 2019, su maistu est Fabritziu Fenu, chi sighit s’arti de su babbu Gesuinu, chi teniat una butega de gelaus in Marrubiu, agiudau de sa pobidda Mauritzia Bellu. De ocannu passau in sa guida de su Gambero Rosso intrat finas su maistu Nicolò Vellino, meri de “ Dolci sfizi” in Macumere. Vellino trabagliaiat in Svezzera, a pustis at scioberau de lassai totu po oberri in Sardigna: una scumissa binta!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.facebook.com/gelateriadolcisfizi/photos/3669214333155215
