Su noi de maju de su 1978 su corpus de su capu de sa Democratzia Cristiana fut stetiu fatu agatai in dd’una Renault 4 orrubia in s’orruga de Caetani in Roma, a metadi caminu intru de sa Prassa de Gesus – domu de sa Dc – e s’orruga de Botteghe Oscure, domu de su Partidu Comunista de tandu: is dus partidus chi coliant pigai un’acordiu po guvernai e chi is brigatistas iant decidiu de cumbatiri cun mitras e pistolas.
Moro teniat in pissu unu bestiri de colori cinisu e sa matessi cravata chi portaiat sa dì chi nde ddu iant liau cun sa fortza in s’orruga de Fani.
Aldo Moro ndi fut stetiu liau con sa fortza cincuantacincu dis a innantis, su 16 de martzu, de una truma de is Brigatas Orrubias. Fut in pissu de una Fiat 130 e andaiat a sa Cameta de is deputaus, aunia depiat nasciri su guvernu ghiau de Andreotti, su de cuatru de issu e su de unu cun su Partidu Comunista Italianu chi a ddu cumpartziri.
In is orus de s’orruga de Fani, is terroristas –armaus meda – iant cumentzau a sparai, bocendu is ominis de scorta: is carabineris Oreste Leonardi e Dominigu Ricci, e is politziotus Franciscu Zizzi, Giuliu Rivera e Arrafiaeli Iozzino. Pighendusì su politigu pugliesu.
Furint sighius cincuantacincu dis de disisperu, in is calis su capu de sa DC at contau cosas medas arrespundendu a is preguntas de Mariu Moretti, su capu de tandu de is Brigatas Orrubias. A pustis no airi agatau perunu acordiu cun is partidus politigus, is brigatistas iant decidiu de bociri a Aldo Moro.
In cussus dus mesis in Roma sa politzia firmaiat a totus: beniat frimada una machina intru de dexi e cumpudaiat una personi intru de binti. Ma, nudda est beniu a pigliu. A mesudì e mesu de su mengianu de su noi de maju cun dd’una telefonada a domu de Francisu Tritto, unu agiudanti universitariu de Aldo Moro, is brigatistas faint agatai su corpus de Moro. De tandu, in politiga, totu est mudau!
Màuru Mura
Giobia, su noi de maju de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/photogallery/primopiano/2018/03/15/aldo-moro-lo-scoop-ansa-delle-immagini-del-ritrovamento-e-del-funerale-_b6d479c4-26a6-48da-9c70-4c4cab0294b8.html
