De oi non teneus perunu orariu po contoniai a domu, ma depeus sighiri a tenni sa mascherina e abarrai a sa stesiada de totus.
A bellu a bellu eus a torrai a sa normalidadi de comenti fustis a innantis de custa pesta maladita e is tzilleris cun is ristorantis, sempiri de oi, ant a podiri umperai is aposentus a intru e non feti in foras, finas chi non at a fairi a ddus preniri. Allirgus medas is ristoradoris, finas chi calencunu morrungiu s’intendit su matessi, a pustis mesis aunia funt abarraus serraus e cun sacrificius meda in is palas.
Ancora est craru pagu cussu chi depint fairi is meris de is piscinas imboddiadas; non si cumprendit beni candu ant a podiri torrai a partiri.
“Sa machina est torrendusì a ponni in motu, ma teneus sempiri calencuna duda e seus aspetendu is regulas precisas”, fait sciri chini trabagliat po aprontai cojas e atras cerimonias.
Finas chi est meri de is discotecas est aspetendu is regulas, ma ancora is espertus, chi depint cumandai, funt studiendu sa cosa: s’at a pigai una decisioni a pustis chi si bint is arresurtaus de su Praja de Gallipoli e de su Fabrique de Milanu.
Ocannu passau is discotecas iant trabagliau po binti dis, futint partias in su mesi de triulas e iant serrau su 16 de austu, ca s’impestamentu fut trocu, massimamenti in sa Costa Smeralda. Imoi, comenti narant de su Silb de Casteddu, is gestoris funt segurus ca “at a benni posta a una parti sa figura legia de ocannu passau e ca si podit trabagliai in atra manera, cun responsabilidadi e sighendu is regulas, comenti in medas ant fatu s’istadi passada”.
Sa speta est chi erribit su eja de su Cts e s’aprontant is discotecas a pustis su Covid cun su logu po baddai a su costau de su ristoranti e cun d’unu gabellotu po is aperitivus. In Sardigna finas su Billionaire at fatu sciri ca at essi umperada sa formula de cena cun spetaculus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.mylondra.it/le-dieci-migliori-discoteche-di-londra/
