Ddi mancaiant 45 dìs, ma si ddas ant scontadas e aici Giuanni Brusca, su mafiosu chi iat cracau su butoni de su telecomandu po bociri su magistrau Giuanni Falcone, in Capaci, nd’est bessiu de presoni. Brusca, chi fut unu de is ominis prus fideli a Totò Riina, beniat annomingiau “Scannacristiani”, at agiudau sa giustissia e s’est incurpau de cosas medas.
Candu ndi bessit de presoni un’omini aici, chi at bociu finas unu pipiu comenti Giusepu Di Matteo, si faint intendiri bogis meda. At chistionau a innantis de totu sa sorri de Falcone, Maria: “Dolori apu provau sciendu custa nova, ma custa est sa lei, una lei chi at bofiu finas fradi miu e tandu tocat a tenni rispetu de is leis. Su spetu miu est chi sa giustissia ddu castit beni cust’omini e non ddi permitat de fairi atrus “disatinus”, finas poita sa storia sua de agiudai a agatai sa beridadi est stetia cun curvas medas e non dereta. Sa matessi giustissia, prus de una borta, teniat dudas mannas po is fueddus de Brusca, massimamenti po sa sienda sua: forsis non ttotu cussu chi teniat ddi est stetiu pigau. Tocat a sciri totu sa beridadi e iat essi legiu po Giuanni, Francisca, Vito, Antoni e Orrocu, chi custu torrit in libertadi e si gosat su dinari chi at fatu cun su sanguni de is atrus”.
Mateu Salvini, su segretariu de sa Lega, at scritu calencunu fueddu in is social: “Giuanni Brusca, su boss mafiosu chi at bociu Falcone e is ominis de sa scorta torrat in libertadi a pustis binticincu annus de presoni. No est custa sa giustitzia chi is italianus minescint”.
Sa sindaga de Roma, Virginia Raggi, su matessi at scritu in Twitter, custus is fueddus chi at umperau: “Brusca bessit de presoni? Non ci bogliu creiri. Est una bregungia manna po totu s’Italia. Seu sempiri de sa parti de chini at gherrau contras de sa mafia”.
Finas su segretariu de su Partidu Democratigu Erricu Letta no at fatu mancai de pigai fueddus: “Unu buciconi a su stogumu chi nosi lassat chena sulidu e ti pregontas comenti est possibili. Sa sorri de Falcone arregodat a totus ca custa lei dd’at bofia su fradi, ma est unu punnigosu su matessi”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.fanpage.it/attualita/mafia-giovanni-brusca-esce-dal-carcere-ha-finito-di-scontare-la-sua-pena/
