Su green pass at a serbiri po atobius medas. Non feti po is cojas, comenti giai scritu in s’urtimu decretu de Mariu Draghi. Sa certificatzioni at a balliri fintzas po partidas intru de amigus e totu is atobius sportivus, po is cuncertus e, candu ant a torrai a oberri, po andai a baddai in discoteca.Atra nova de su decretu est cussa de cantu at a balliri su certificau e candu at essi donau: su green pass at a benni donau a pustis airi fatu su vacinu duas bortas e at a serbiri non prus po ses mesis ma po noi. Candu si fait sa prima vacinatzioni invecias s’at a donai unu certificau chi at a serbiri comenti de green pass, de cuindixi dis a pustis finas a su segundu vacinu.
In su decretu s’agatat finas ca su pass, o fintzas su certificau chi narat ca unu est curau in is urtimus ses mesis o unu tamponi negativu fatu in is urtimas corantot’oras, si podit umperai po andai a festai cojas, batiaris o cunfirmas, ma s’est trabagliendu po ddu umperai in is cungressus o po castiai partidas e, comenti eus giai nau, po intrai in discoteca.
Forza Italia at giai presentau una modifica de fairi poita su pass serbat a sa genti po andai a agatai genti de sa familia in is ispidalis.
A decidiri cantu genti possat intrai a is atobius, in cale chi siat logu, at essi su “Comitato tecnico scientifico” chi cenarba at a nai sa sua po is festas a pustis is cojas. Si pensat de non ponni peruna regula po candu si festat in logus obertus. Chi, invecias si festat a intru su numuru depit essiri controllau.
In su fratempus su numuru de is impestaus nous, in sa terra nosta, sighit a bessiri, ma chena numurus mannus comenti una pariga de cidas a oi: eriseru su bulletinu regionali chistionaiat de sessantanoi impestaue e, a dolumannu, de cuatru mortus. Sa nova bella est ca s’est abascendu su numuru de sa genti chi s’agatat in is ispidalis.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto://www.zoom24.it/2021/05/19/green-pass-
