Una maistu mannu de sa cantzoni italiana si nd’est andau po sempiri, lassendu sa bogi sua e totu cussu chi at scritu: Franco Battiato, est mortu eriseru a mengianeddu in domu sua. Fut malaidu de tempus meda e teniat setantases annus. Fut nasciu in sa provincia de Catania in su 1945. S’interru at essi po pagu genti, ant fatu sciri de sa familia sua, e po chini at sighiu su cantanti in totu custus annus est una cosa normali, poita non ddi est mai pragiu a essiri protagonista. Po mori de sa maladia si fut arretirau in su 2019 de dogna manifestatzioni.

Battiato sciat umperai beni meda is fueddus e fut unu de is prus mannus de totu cussu chi ant scritu cantzonis. Non fut feti cantanti ma finas poeta, filosofu e pintori.

Nos at lassau cantzonis famadas comenti “Centro di gravità permanente”, “Voglio vederti danzare”, “La stagione dell’amore”, “Up patriots to arm” e “La cura”, feti po ndi cicai calencuna intru de is medas chi at scritu, e funt intradas in is contus de sa musica italiana.

De su 1964 Battiato si ndi fut andau a Milanu po meglius insighiri su bisu de diventai cantanti e de cussus tempus, in intervistas medas, arregodaiat: “Milanu tandu fut una citadi de nebida e mi ddue soi agatau beni. Non fui meda patigu de chitarra, ma dda ponia a dispositzioni in d’unu cabaret, su ‘Club 64’, aunia ddue funt finas Paulu Poli, Enzo Jannacci, Lino Toffolo, Arrenatu Pozzetto e Brunu Lauzi. Deu oberia su spetaculu cun duas o tres cantzonis sicilianas”.

A pustis de sa morti de Battiato funt medas cussus chi ant scritu calencuna cosa po ddu arregodai, a cumentzai de su ministru de sa Cultura Dario Francescini chi at nau ca: “Battiato est unu de cussus chi non si podint strociri po nudda, fut unu maistu mannu e nosi lassat un’eredidadi po sempiri”.

Finas su presidenti de sa Repubblica, Sergiu Mattarella, at nau sa sua: “Mi dispragit meda poita fut artista mannu e sintzeru e cun d’una cultura chi tenint in pagus”.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.occhionotizie.it/com-e-morto-franco-battiato-malattia/