Sa Sardigna si preparat a torrai in zona bianca de su primu de làmpadas. Su Guvernu, difatis, est in cica de mudai is regulas po decidiri is coloris de is regionis. No at a contai prus su Rt, ma, prus che a totu is percentualis de sa genti in is ispidalis. Po custus numurus s’Isula at essi posta in cussa regionis cun is erriscus prus piticus, paris a su Friuli Venezia Giulia e a su Molise. De sa cida in fatu ant a sighiri Abruzzo, Veneto e Liguria.
Una nova, aprovada de su Cunsigliu de is ministrus, chi erribat paris a is novidadis po totu cussu chi si podit oberri. Is regulas noas po binciri su Covid non ci ant a bessiri totu paris, ma a bellu a bellu. S’at a podiri abarrai foras de domu finas a is undixi de merì de oi finas a su seti de làmapadas e de sa dì in fatu finas a mesunoti e de su bintunu, invecias, finas a candu si disigliat.
Sempiri de su primu de làmpadas is ristorantis e is bar ant essi obertus finas in logu serrau, ca imoi podint oberri feti in foras. De su bintidus de custu mesi obertus mercaus e centrus comercialis e de su binticuatru is palestras. Feti de su primu de triulas, invecias, ant essi obertas is piscinas. De su 16 de su mesi ch’intrat si podint festai is coias, ma feti cun su “green pass”. Po is logus aunia si baddat tocat a aspetai ancora.
In su fratempus is numurus de is impestaus nous funt sempiri prus bascius: eriseru in su bulletinu de sa Regioni si ligiat “feti” de bintitres!
De martzu de ocannu passau, in Sardigna ndi eus tentu 56.155 de impestaus e aici funt dividius in s’Isula: 14.667 in sa Citadi metropolitana de Casteddu, 8.531 in su Sud Sardigna, 5.090 in sa provincia de Aristanis, 10.799 in cussa de Nugoro, e 17.053 in sa provincia de Tatari.
Forsis custa borta ndi seus bessendu de a beru, tocat a tenni un’atru pagu de passientzia.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.panoramasanita.it/2021/02/27/la-sardegna-in-zona-bianca/
