Po sa borta de unu, in Casteddu, una parti de s’esamini de maturidadi, dd’ant sustennia in sardu. Giaime Corongiu, discienti de s’urtimu annu in su Cunvitu Natzionali, at pediu, e otentu, de podiri chistionai in sardu intru de s’interrogazione a bogi. No est feti po amostai comenti si scipat fueddai sa limba nostra, ma finas po donai sa giusta dignidadi a su sardu chi, de diora, est posta a un’ala. Giaime at fueddau, duncas in sardu, de sa chistioni de is escludius e de chini at perdiu in sa storia, partendu de sa pintada famada “I mangiatori di patate” de Vincent Van Gogh, finas a lompiri is leis de sfrutamentu de su trabbagliu postas in peis de Karl Marx. S’orrest de s’interrogatzioni, su piciocu, dd’at donada in italianu e francesu, comenti narant is leis de su liceu europeu.
“A chistionai in sardu a s’esamini de maturidadi, dn’at bogau a pigliu, meglius meda, un’orrogu fundudu de mei”, at contau Giaime Corongiu. “Est una limba, sa nostra, chi apu imparau in famiglia e, is professoris chi apu tentu, ant cicau de dda ponni in artu”.
Is professoris, cuntentus meda a partiri de Andria Prost chi ghiaiat sa cumissioni, ant arreconnotu, a Giaime, de sciri umperai sa limba comenti de parti de fundamentu de su caminu de su discienti.
Finas in su 2022, in Cuartu, Luisu Albertu Angioni, de Maracalagonis, iat fatu s’esamini in sardu, fueddendu de sa relata intru de s’omini cun sa natura in su Medioevu, finas a lompiri a is tempus nostrus chistionendu de bioetica.
Redatzioni
