Si serrat cun cuasi trintaduamila esaminis su fini de cida de “Sardi e sicuri”, s’indagu de sa Regioni po cicai de binciri su Coronavirus. S’atobiu est stetiu aprontau cun s’agiudu de s’Ares-Ats e is Cumunus de is biddas interessadas.
Trintatres in biddas chi s’idagu at tocau: Assèmini, Cabuterra, Su Masu, Uta, Santu Sparau, Dèximumannu, Biddesorris, Deximeputzu, Silicua, Biddaspitziosa, Biddaramosa, Pula, Teulada, Santu Perdu, Domus de Maria, Isili, Arrolli, Nurri, Mandas, Seurgus Donigala, Scalepranu, Nuragus, Nuradda, Iscroca, Gerxei, Sadili, Stersili, Gesigu, Goni, Serri, Jaroi, Biddanoa ‘e Tulu e Seulu. In totu funt 31.782 is tamponis fatus.
“A oi – faint sciri de sa Regioni – funt centutrintacincu is biddas chi ant agiudau sa Regioni a-i custu indagu, cuasi sa metadi de is biddas de totu sa Sardigna. In totu si funt fatus 260mila test intru de s’Ogliastra, Nugoro e su nugoresu, Sud Sardigna e Casteddu cun totu is biddas in is orus”.
In su mentris, Thierry Breton, capu de sa “task force” de sa UE, no est disisperau po su benidori. S’istati chi benit at essi cuasi oguali a-i cussa de ocannu passau, narat, e a s’imunidadi po totu s’iat depiri erribai a intru de su mesi de triulas. De oi finas a Pasca Manna in Italia ant a erribai tres milionis de vacinus e dee custus otantamila funt po sa Sardigna. Po unu indagu chi at fatu su Sole 24 ore, in Sardigna sa media de is vacinus de s’urtima cida est de 5.731 po dogna dì e andendu a innantis aici feti in su mesi de martzu de su 2022 s’at a podiri chistionai de s’imunidadi po su 70% de is sardus, tocat a coidai de prus, finas chi, est a nai, is numurus funt crescendu.
Po imoi, de urtima chi fut, s’Isula nosta nd’at giumpau sa Liguria cun sa Calabria. In s’ora chi si faint is vacinus est erribendu unu agiudu mannu po binciri custa gherra: su calori chi de sempiri est nemigu de is virus. Cun su tempus bellu e cun su soli sa genti abarrat prus in foras, e custu est unu beni.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.ilmeteo.it/notizie/coronavirus-e-meteo-caldo-e-afa-distruggono-il-covid19-ecco-lo-studio-con-la-mappa-dei-contagi-094335