Galu est acoitu po s’arriolai de sa classifica de su Casteddu, chi eriseru nd’at boddiu una sonada in Firenze chena podiri nai nudda. Ma cussu chi parit a is ogus de is tifosus est una scuadra chi timit meda a si dda giogai. Est a nai ca sa Fiorentina de Italiano est una grandu bella scuadra e ca in Firenze ant essi medas a ndi bessiri batius. Ma custu Casteddu aunia podit erribai? Calencuna scuadra, comenti sa Salernitana e forsis su Venetzia e su Spetzia, parint postas peus! A cantu s’est bidu in custas primas noi partidas is sardus giogant, a dogna manera peus.
Mazzarri at chistionau a pustis de sa partida, perdia po 3-0 est de arregodai, cun is giorronalistas: “Non depu e non mi possu ponni a arregodai is giogadoris chi non ci funt, ma in donnia calencunu si strupiat, seus unu pagu moddis”. Finas a su rigori – sighit a nai s’allenadori livornesu – fustis fendu una partida bona e iaus arriolau calencuna borta sa Fiorentina. A cumentzu de sa segunda parti bolia cambiai tres giogadoris totu paris, ma eus pigau inderetura cussu gol de Vlahovic e sa partida est acabada inigui. Fui curiosu de biri sa scuadra oi, torru a nai, a su cumentzu pariaus postus beni, ma in conca nosta seus moddis meda: nau sempiri a is piciocus de non betai un’ogu a sa classifica, ca est tropu acoitu, ma non mi ponint menti. Ndi besseus cun su trabagliu, ca is giogadoris funt bravus”.
Caceres e Nandez si funt strupiaus: “Proit in s’infustu, e gioghendu dogna duas o tres dis no est chi totu custu agiudat. Imoi po sa partida cun sa Roma de mercuri a merì bieus chini si dda podit giogai, sa spera est chi is giogadoris, in denanti de is tifosus nostus, tengiant cussa barra chi no ant tentu in Firenze. Abbisongiat de trabagliai meda e pedu a is tifosus de nos agiudai po ndi bessiri de custa situatzioni”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.youtube.com/watch?v=_x_UmOI4U2s
