Finas a eriseru funt seti (Sarrocu, Samugheo, Sindia, Figari, Bono, Uri e Putumajore) is biddas sardas serradas cun ordinantzia de is sindigus po mori de sa pesta de su Coronavirus. Imoi bessint a dexi ca finas in Gavoi, Burcei e Santu Perdu est erribau su cumandu de abarrai totus incungiaus in domu.
In Gavoi, s’artziada de is positivus a su virus at custrintu su sindigu Sarbadori Lai a serrai totu. Cun s’ordinantzia in Gavoi serrant totu is scolas e duncas de oi is letzionis si faint in domu indenanti de su computer. De is bar, is ristorantis, is pitzerias e butegas chi bendint durcis non si ndi podit leai nudda, comenti fut a innanti, ma si podit fairi portai sa cosa in domu e totu, bastat una telefonada. Proibiu su cumerciu de is ambulantis e non si podit mancu spaciai sa cosa de bufai e de papai in is areas pubricas.
Orruit s’obligu de ponni a un’ala su 30% de is vacinus chi erribant, aici non c’est prus unu de is impedimentus, chi po su presidenti de sa Regioni Christian Solinas e s’assessori a sa sanidadi Mariu Nieddu, at fatu andai tropu a bellu sa vacinatzioni de is sardus.
A metadi arbili in Italia erribant prus de seti milionis de vacinus de sa Johnson&Johnson e a sa Sardigna nd’at a tocai cuasi duxentumila. Est de arregodai ca custu vacini si fait feti una borta, a s’imbessi de cussus chi giai connosceus, e po custu est facili chi si coidit de prus.
Po imoi funt 217.699 is sardus vacinaus e a intru de cras iant depiri erribai 13.100 vacinus de Moderna, 28.080 de Pfizer e 35.900 de AstraZeneca e a intru de su 12 de arbili depint erribai atrus otantatres mila vacinus sempiri de Pfizer ca in Sardigna funt feti cincuantasesmila is becius vacinus. Tocat a curriri!
Atra nova de importantzia manna est ca de cras is nascius de su 1942 a su 1944, chi non funt malaidus de atra cosa, si podint registrai po nai ca si bolint vacinai.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://en.wikipedia.org/wiki/Gavoi
