Est beniu, at castiau e at cumentzau a binciri: veni, vidi vici! In pagus fueddus est custu Lionardu Semplici, s’allenadori toscanu chi at fatu torrau a nasciri su Casteddu. Eriseru puru, a pustis sa prima partida binta in Crotone, at bintu sa partida cun su Bologna: est bastau unu gol de Tanieli Rugani in su primu tempu: cun atrus tres puntus aciuntus a una classifica chi duas cidas a oi pariat de ci scavulai, imoi su Casteddu nd’at giumpau su Torinu e non s’agatat prus in s’inferru chi boliat nai Serie B. C’at de nai, est importanti meda a ddu tenni craru in conca, ca is piciocus de Davidi Nicola depint giogai duas partida, cun su Sassuolo e cun sa Lazio, ca s’Asl de Torinu ddus at frimaus po sa pesta de su Covid. Imoi si bint de acanta finas atras scuadras che su Benevento, su Spezia e sa Fiorentina, chi funt feti a cuatru puntus de is piciocus de Semplici. Duas partidas giogadas, duas vitorias, tres gol fatus e manc’unu pigau, sa retzeta parit facili ma chena capassidadis non si fait nudda!

Contaiat a binciri eriseru e is orrubius-asulus ce dd’ant fata chena tribuliai: forsis, antzis de seguru, su fubal no est aici dificili a ddu giogai comenti faint creiri is scentziaus. De sempiri, si scit, contat cuasi prus sa conca de su corpus, e Semplici at fatu unu miraculu de averas ca is giogadoris, cun Di Francesco, pariant chena gana e timiant a totu. Imoi, invecias, est craru a totus ca sa scuadra calat in campu cun atru spetu e cicat de si dda giogai cun barra e cun gana. Bortas medas bastat a cambiai e totu parit prus bellu, ma non sempiri est aici, imoi tocat a aspetai is duas paritdas chi erribant, cun sa Sampdoria in Genova e cun sa Juventus in Casteddu, po biri chi su Casteddu est sanau o chi est feti cosa de pagu contu. Po imoi, a pustis custas urtimas duas partidas bintas, sa classifica torrat a erriri, ma tocat a trabagliai ancora meda, ca sa Serie A est longa e is perigulus funt sempiri in palas de su corrunconi.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto: https://www.fantacalcio.it/serie-a/ultima-giornata/03_03_2021/cagliari-bologna-cronaca-tabellino-voti-fantacalcio-402089