Uliana fait is cosas chi intendit in is intragnas: s’orruga intregada a Vittorio Emanuele mudat su nomini in Corso Mario Melis. Bella nova de averas! Su Cumunu de sa bidda scioberat aici de donai importantzia a unu de is figlius prus nodius chi apat tentu e chi de Uliana est stetiu finas sindigu. In is dis chi ant erribai sa giunta, chi bit Bustianu Congiu comenti de sindigu, at a deliberai custu bellu progetu. “S’uficialidadi de totu dda eus a tenni in d’una dì totu intregada a issu, s’aministratzioni est trabagliendu finas cun atras novas. Po custu eus pediu finas s’agiudu de sa Regioni Sardigna”, at fatu sciri su sindigu.

“Soi seguru – at aciuntu sempiri Congiu – ca chi in bidda, in is annus Settanta massimamenti, iant airi pregontau cun cali personi connota si boliant cambiai, medissimus de custus iant airi arrespustu propiu cun Màriu Melis. Oi piguru a ddu pensai totus si cuntentat ca fut un’omini sabiu e cun orgolliu che pagus, sempiri prontu a gherrai po totu is diritus de is sardus e de is olianesus prus che a totu”

Giai in su 2008 a Melis iant intregau s’aula consiliari e po custu dogna borta chi s’imbucat in cuss’aposentu s’intendit sa presentzia sua. “Chena ndi tirai nudda a nemus deu pensu ca po is sardus Màriu Melis est su presidenti de sa Regioni prus mannu chi apeus tentu e po nosu olianesus est, de seguru, su Sindigu chi arregodaus de prus”, at acabau Bustianu Congiu.

Màriu Melis, chi fut biu, iat airi lompiu is cent’annus su 10 de làmpadas, fut nasciu in Tortolì et est mortu in Nugoro su primu de Sant’Andria de su 2003. Est stetiu a innantis sindigu de Uliana e in segus consiglieri e assessori provinciali. De sa provincia est passau a essiri consiglieri regionali, fendu s’assessori paricias bortas finas a diventai su presidenti de totu is sardus, una prima borta in su 1982 e dapoi de su 1984 a su 1989.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

 

 

Foto: Archivio Domus de Janas