“Non eus donau atentzioni meda e imoi seus paghendu”. Aici at nau s’assessori a sa Sanidadi Màriu Nieddu chistionendu de sa zona orrubia in Sardigna. Ddu at fatu in Radio Uno intervistau in sa trasmissioni “Che giorno è”. “In is cidas aunia fustis in zona arva eus pensau, mali est a nai, ca su virus fut bintu – at sighiu a nai – depiaus cumpudai de prus e non est stetiu fau beni, totu custu nos at portau a sa zona orrubia. A dogna manera in cussas tres cidas s’economia at sunfriu de mancu, beridadi est ca abasciendu s’atentzioni nos eus giogau sa possibilidadi de essiri sa prima regioni in Italia a torrai a oberri, in seguresa, po sa stagioni turistica chi est erribendu.

Nieddu at fueddau finas de su prangiu in Sardara: “Chi est beru chi ddue fut genti acapiada a sa Regioni, cussa genti chi depiat donai s’esempiu non ddu at donau e si ndi depit pigai sa responsabilidadi”.

Un’atru chi at nau sa sua po s’acabu de sa Sardigna in zona orrubia est Andria Crisanti, diretori de su Laboratoriu de microbiologia e virologia de s’ispidali de Padova e babu mannu de s’indagu “Sardi e Sicuri”, in Sardigna: “Una pesta no est una cosa chi at essi po sempiri, in su pratu ddu est su virus de una parti, sa serrada de is scolas e de is atras atividadi de s’atra. E in segus ddu est sa vacinatzioni. Chi nosu ndi tiraus is regulas po binciri su virus e donaus prus possibilidadis de bessiri a sa genti mudat s’ecuilibriu. Duncas chi una cosa funtzionaiat in zona arangiu non po fortza funtzionat in zona arba o in zona groga. Custu est sussediu in Sardigna”.

Is novas de eriseru po su numuru de impestaus nous funt de castiai cun atentzioni manna: 502 funt is positivus in d’una dì e 8 is mortus.

Sa cuscentzia, feti cun sa cuscentzia ndi eus a bessiri, ca su mudamentu de regulas prus tostadas no est sa sola orruga chi podeus tenni.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto: https://www.ilmeteo.it/notizie/coronavirus-per-la-prima-volta-una-regione-pu-diventare-zona-bianca-gli-aggiornamenti-082748