Cantus de bois funt prontus a scumitiri ca sa natzionali de fubal italiana binciat is Europeus a su cumentzu de sa manifestada? Pagus, pagus meda, nosu de seguru nou! Invecias eriseru in Londra, contras de is meris de domu, sa scuadra de Mancini, a pustis 53 annus ce dd’at fata. Allirghia manna de totus, ma is prus allirgus pariant Mancini e Vialli chi si funt imbrassaus comenti dus piciocheddus. Ita at essi passau in is concas insoru? Forsis ca si funt torraus a pigai cussu chi, in su matessi stadiu, iant airi meritau in su 1992 cun sa Sampdoria in sa finali de sa Coppa dei Campioni! Facili chi siat aici.

In sa storia de is europeus de fubal s’Italia no at mai tentu vida longa: feti una borta at bintu e un’atra pariga de bortas (contras de sa Spagna e sa Francia) at perdiu sa finali. Mancini, ca est cussu chi at ghiau is piciocus, at bintu aunia allenadoris famaus ant faddiu, finas cun giogadoris prus fortis meda de custus. S’allenadori italianu at amostau comenti si ndi pesat una scuadra chena steddas, fendu cumprendiri a totu is giogadoris ca dognun serbiat, ma si ndi podiat fairi de mancu puru.

In finali, est a nai, funt erribadas is scuadras chi ddu minesciant de prus: s’Inghilterra, chi est de arregodai fut in domu sua, e s’Italia chi c’at stupau de sa manifestada scuadras famadas comenti su Belgiu de Lukaku e sa Spagna. Unu pagu dd’at agiudada sa fortuna puru, pagu cosa po nai sa beridadi, ma forsis chi unu bidu de su pei de Arnautovic non s’agataiat prus addei de cussu de sa difesa italiana…

Si ddu ant meritau is piciocus de Mancini e imoi depint tenni in conca is Mondialis de su Qatar de ocannu chi benit, ca finas is scuadras de s’atra parti de su mundu non funt prus fortis. Mancini ddu scit e, de seguru, est giai trabagliendu po binciri inigui. Custa borta scumiteus nosu puru…

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.raisport.rai.it/articoli/2020/05/calcio-e-euro-2020-italia-campione-europa-4faf2401-6eb2-4436-b419-0d0e691ec699.html