“Po imoi, cun is vacinus, nosi donat agiudu su calori puru. Ma s’istadi acabat e in su fratempus tocat a vacinai cantu prus genti si podit poita sa varianti Delta, chi picigat meda de prus, at essi cussa cun is numurus prus mannus, comenti giai est sussedentu in Inghilterra e is natzionis a su costau. A pustis at a erribai calencun’atra varianti e non scieus chi su vacinu chi seus fendu at a serbiri. Cussu chi scieus est ca prus genti s’impestat e prus variantis ndi bessint de su Covid”, funt is fueddus de Ferdinando Coghe, diretori de su Laboratoriu de analisi de sa Aou de Casteddu-Pàuli. Narat puru ca su tempus no est meda!
Is studius chi ant fatu in Israele narant ca po sa varianti Delta su vacinu Pfizer serbit prus pagu de su 30%, e custa est una nova chi no allirgat de seguru. “Depeus vacinai su prus coitendu possibili genti meda, mascamenti is indianus e is cinesus, chi funt, prus o mancu, dus miliardus e mesu, poita aunia su virus mudat sa varianti sua s’ammanniat”.
De su matessi parrer est Sergio Badubieri, diretori de s’Aou de Tatari: “Mancant ancora tropu personis chi tenint prus de sessant’annus, funt is prus debilis e si depint vacinai ca po cussus su virus est prus tostau. dd’acabint de tenniri dudas. In atongiu non creu chi sussedat comenti ocannu passau e po custu tocat a torrai gratzias a sa genti chi s’est vacinada e a cussus chi si funt giai ammalaidaus”.
Sa cunvintzioni est ca in atongiu, de seguru, crescint is impestaus, ma ant essi pagus is mortus e is ricoveraus, sempiri chi is prus becius faint su vacinu. Sighit sempiri Badudieri: “Chini non si vacinat, non si stesiat de sa genti, non umperat sa mascherina e non si pulit is manus comenti si depit, est andendu a si dda cicai”.
Coghe de su cantu sou aciungit: “Tocat a fairi su tamponi, po cussus chi non tenint su green pass e a chini erribat de aunia su Delta est prus grai. Cumprendu beni is problemas de s’economia, ma po mei non si depint torrai a oberri is discotecas in is logus po turistas. Chi dd’as obereus dda eus a pagai”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.adnkronos.com/vaccini-regione-lazio-al-via-prenotazione-12-16-anni_6wRKp9z65IjBFggeLsBM0h
