Ovodda, bidda pitica in sa Sardigna de su centru, est connota massimamenti po su pani po is ominis e is feminas chi addurant finas a is cent’annus e po Gianfranco Matteoli, giogadori de fubal famau. Matteoli si pesat in custa biddigedda, ma po giogai a bocia depit lassai sa terra sua e ddu pigat su Cantù (scuadra de sa provincai de Como). Innoi cumentzat a giogai in Serie D, ma in segus intrat in su mundu de su professionismu. A innanti de torrai in terra sarda at giogau cun sa Reggiana e su Como in Serie B e a pustis cun su Como, sa Sampdoria e s’Inter in serie A. Cun sa scuadra de Milano at bintu su scudetu in un’annada chi ancora benit tzirmoniada comenti una de is prus bellas de sempiri po is interistas. Scuadra manna cussa de su 1989 e Matteoli ndi faiat parti in prenu.
A pustis sa gloria milanesa, candu teniat 31 annus, a Matteoli erribat sa lamada de su Casteddu. Non podiat torrai ca nou a sa scuadra de sa terra sua chi torraiat in Serie A a pustis airi bintu is campionaus de serei C e B unu infatu de s’atru. Tonino Orrù fut su presidenti e Ranieri s’allenadori.
Cuatr’annus, in campu, spantosus cussus de Gainfranco in Casteddu e a pustis est diventau finas su Responsabili de is scuadras de is piciocheddus.
At portau su Casteddu in Coppa Uefa finas a sa partida prima de sa finali contras de s’Inter, gioghendu totu is partidas e cun sa fascia de capitanu in su brassu. In cuatr’annus chi est abarrau a giogai in Casteddu at sartau feti ses partidas.
S’ovoddesu est finas unu de is primus sardus a bestiri sa maglia de sa Natzionali italiana, at giogau sa prima borta in su mesi de idas de su 1986 cun Malta e a pustis ddu at fatu in atras cincu partidas.
Matteoli at giogau 146 (intru de Serei A, Coppa Uefa e Coppa Italia) ponendu sa bocia in palas de is portieris po cincu bortas.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://twitter.com/cagliaricalcio/status/987648956560748544
