Imprentamos su segundu tema de sa gara de Borore in s’ierru de su 1978 -su 28 de frearzu, festa chene santu- chi at bidu in su palcu a Peppe Sozu cun Remundu Piras. Sun 72 otavas nàschidas a bolu e in bona muta, comente cumbinaiat semper a custos duos isteddos de s’istòria de sa poesia cantada in limba sarda logudoresa.
A Piras li restaian duos meses e tres chidas de vida ebbia (tiu Remundu est mortu in Biddanoa su 21 de maju de su matessi annu), duncas a pustis de custa gara in Borore est torradu a pigare a su palcu un’ateruna ’orta solamente: in Montresta pro sa festa de Santu Cristolu su 28 de Abrile avreschende a sa die 29.
Cando sos poetas an cantadu in Borore, Peppe Sozu deviat cumprire 64 annos a su 24 de Làmpadas e Remundu Piras 73 a su 29 de Santu ’Aìne.
- Sozu (
…………………………………
…………………………………
…………………………….fora
si su destinu incue mi collocat.
Como sa zente dae terra invocat
chi unu tema cantemus ancora.
Devo leare un’ateruna istrada
ca a cantare sa lughe m’est tocada.
- Piras (1’04”)
A tie t’est tocadu su lugore,
cantadilu ca lùghidu ja sese.
Ma deo sempre m’imbòligo in pese,
comente poto tiro cun suore
tantu chi tue, pòpulu, bi crese,
chi tenzo su contrariu in favore.
Ana dadu unu tema a mie puru
mancari deva cantare s’iscuru.
- Sozu (1’06”)
Su tema tou e-i su tema meu
de discuter lu semus como in gradu.
A bier unu logu illuminadu
penso chi diet gioja e recreu
da unu fiat chi at nadu Deu
chi at lughe e iscuru separadu.
Est evitada ogni confusione,
como no semus pius a cumone.
- Piras (1’03”)
Tue sa parte tua ti che jughe
ma deo apo una parte e so seguru.
Deus bogat sa lughe dae sa tughe
e nat: a s’universu: brilla puru
cust’autore ch’at criadu sa lughe
est Deus e restadu est in s’iscuru.
Nachi est de sa lughe su babbai
tantu deo no l’apo ’idu mai.
- Sozu (1’07”)
Deus de lughe vivet in sa zona
ch’est de lughe e fiama s’impiantu
ma no ti podes dare cussu ’antu:
nende de Deu, in àteru arrejona,
ca fina dogni santa e dogni santu
ja jughen risplendente una corona.
Cussa est de fide s’eterna lumera
chi che raju che pigat in s’aera.
- Piras (43”)
De lis ponner corona est oportunu
ca veneran sos santos in totue.
Nachi su chelu tenen in comunu
ma su chelu adasegus de sa nue.
A ses capatze ’e mi lu narrer tue
totu sos santos inue che sunu?
Tzeltu in sa lughe den esser po te
però che sun in s’iscuru pro me.
- Sozu (56”)
In sa lughe ’e s’eternu firmamentu
sos santos tenen sa sede a grandesa
ca est totu in sa lughe sa bellesa,
ue at iscuru faghet ispaventu.
E cando in cheja b’est su Sacramentu
bi at vicinu una làmpana atzesa
chi ti dat lughe a note e a de die:
cussa ti narat chi est Deus inie.
- Piras (1’04”)
A Deus nos l’ana nadu e ammitidu
ja l’amos puru credentes ebbia.
An atzesu una làmpana e-d-est bia,
deo mesu mi so persuadidu:
sa làmpana teninde ja apo ’idu,
no apo ’idu inue est su Messia.
Deo tra me matessi apo cumpresu
chi su Messia ch’est pius atesu.
- Sozu (56”)
Ma de sa fide totu s’impiantu
batit vicinu su chi ch’est lontanu
e deo ti nde poto dare ’antu
ca apo fatu a connoscher su sovranu:
finas in su batizu ’e su Giordanu
s’est abbasciadu s’Ispiritu Santu.
Sa zente l’at notadu dae atesu
falende in-d-unu raju ’e lughe atzesu.
- Piras (50”)
Nachi est caladu dae s’altu monte
e sa columba fit sa ’oghe ’e Deu.
No l’apo ’ida, no, cun s’oju meu
po chi sa fide la ponzat a ponte.
Dante cand’est pigadu a s’Empireu
ja s’at postu su pòddighe in su fronte.
Nara, s’idea sua ja fut cudda:
s’est postu goi ca no bidet nudda.
- Sozu (58”)
Ma Dante cun sa lughe de sa mente
notadu at cuss’iscena tantu bella.
E da chi naschet Cristos innotzente
in s’istalla b’at lughe che in capella
e partin sos Res Magios de Oriente
da ch’an bidu sa lughe de un’istella.
Dae sa lughe an fatu proa manna
de ch’arrivare fina a sa capanna.
- Piras (46”)
Dogni Magiu a sa gruta ch’est andadu
e adoran su pitzinnu a sensu fissu.
Però da chi da chelu nd’est caladu
in-d-una bella rughe l’ana missu
e da ch’est moltu est risuscitadu
ma a ue ch’est bandadu l’ischit Issu.
L’an iscritu e l’an tzeltos ilgiaridu
ma no bi crede chie no l’at bidu.
- Sozu (50”)
Da chi no bides no nde ses seguru
ma una cosa narrer ti cheria.
Sa lughe traciat de chelu sa via,
no est parte ’e leare a mancu in curu
e no adeghet meda a su Messia
como chi che lu ponzas in s’iscuru
ca est bénnidu e mortu est in sa rughe
s’umanidade pro ’ogare a lughe.
- Piras (37”)
Si ti naro chi in cussu no bi creo,
deo cheria ispiegadu fissu:
s’est pigadu a su chelu o a s’abbissu
naramilu e po bona ti la leo:
in s’iscuru no l’apo postu deo
ca in s’iscuru postu si ch’est issu.
No creo chi gasie a mie acorret:
si cheret a lu ’ider chi che torret.
- Sozu (53”)
In aterue su tema che jughe
si non ti paris, Remundu, seguru
ca Gesu Cristu moltu est in sa rughe
po ch’’ogare su mundu dae s’iscuru:
deo ti lu confirmo e so seguru
chi Gesu Cristu ch’est sempre in sa lughe.
Tue no mi che ’ogas dae binariu
o proa a mi mustrare su contrariu.
- Piras (43”)
Deo ti dia narrer chi bi creo
ma non so un’ipocrita ’e gasie.
Dogni cosa po bona no la leo,
bisto cunsiderende note e die:
tue domandas lughe dae a mie
e dae te ja la domando deo.
Timo ch’a Deus no l’apas connotu
ca semus in s’iscuru nois totu.
- Sozu (58”)
S’idea ’e Cristos bogachela a fora,
non balit a nde fagher pius contu.
Deo ti mustro su sole a dognora
ca a nos illuminare est sempre prontu:
cosa bella est s’arrivat s’aurora
chi issa imperat fina a su tramontu.
Si tue miras cussas lughes bellas
b’est sa lughe ’e sa luna e sas istellas.
- Piras (39”)
Luna, istella e sole meda contat
e deo cussu ja ti l’apo ammissu.
Su sole est lùghidu e puru tramontat,
tramontat e no s’’idet nemmancu issu:
tue naras chi b’at chelu e abbissu
ma chie arrejonende ti cunfrontat?
Bides chi su chi narat est areste,
non podes narrer mancu inue ch’este.
- Sozu (55”)
Ma a s’iscuru unu tantu ’e terrinu
b’at chi non ponet sa lughe in guai.
Su raju luminosu ’e sole assai
de terra che penetrat in su sinu
e si ’e su sole b’andas a vicinu
igue iscuru ja no bi nd’at mai
ca illùminat astros, terra e nue
e bi so deo ma no bi ses tue.
- Piras (42”)
Tue lu naras però no m’as bidu,
deo soltantu in sa terra cumando.
Tue no m’as ispiegadu tando
s’est totu lughe cantu as ammitidu:
deo no isco da ue so ’ennìdu,
tue no mi lu naras a ue ando.
Inoghe b’at mistériu e-d-est nue
e semus in s’iscuru deo e tue.
- Sozu (55”)
Cussa est tzeltu un’àtera partida
chi detzidit inoghe ogni individu.
Da chi sos ojos tuos ana ’idu
sa zona risplendente pius lughìda
e ti naran a da chi ses naschidu:
ses bénnidu a sa lughe de sa vida,
lughe perfeta chi no iscoloris
sa ch’as in s’oju fin’a cando moris.
- Piras (40”)
Deo a mi che morrer mi nde dolzo
ca mi piaghet in terra a campare
però inoghe unu pagu l’iscolzo,
po pagu tempus lu poto imbrogliare.
No m’as a narrer da chi mi che molzo
a cale logu mi ch’apo a bandare:
sa risposta resultat isbagliada
puite igue lughe no bi nd’ada.
- Sozu (53”)
Ma sos mios divinos risplendores
a pustis morte raggiunghen sa meta
poite illuminada una cometa
la poden bier mannos e minores:
in Lourdes pregunta a Bernardeta,
in Fatima pregunta a tres pastores
chi si lis est Maria presentada
con dogni raju ’e lughe illuminada.
- Piras (37”)
A Bernardeta mancu la ventomo,
fut pastoredda e pòbera innotzente.
Ma deo como a tie so presente,
nois semus cantende in custa domo:
a pones chi no mi naras in sa mente
ite cos’eo so pensende como.
No mi lu podes narrer de seguru
prite sa mente mia est a s’iscuru.
- Sozu (54”)
Remundu, non mi pones contivizu
bidinde tropu allegru s’ambiente.
Si de criare cosas as disizu
in su donu chi t’est apartenente
si no lu ’ogas a sa lughe a pizu
su ch’as immaginadu intro sa mente
de causa peruna no as risoltu:
inie est nàschidu e inie est moltu.
- Piras (42”)
Su pensamentu a fora si che catzat
però cumpenetràrelu ’enit male.
Un’isposa a s’isposu si piatzat
amorevole e bella e cordiale:
lu ’asat, lu carignat e l’abbratzat,
si drommit e li fichit su pugnale.
Eco finidos sos sognos de s’oro
ca no ischis it’at intro su coro.
- Sozu (55”)
A mie cuss’idea no mi apagat
po chi s’ocasione ’ides propitzia.
Sa idea at pensadu cun malitzia
e-i su tàlamu de sàmbene allagat
poi b’intrat in mesu sa giustitzia,
in totucantos sos passos indagat
adasegus torrende in dogni situ
fin’a bogare a lughe su delitu.
- Piras (38”)
Da chi cundennat cussa miseràbbile
e a boltas l’assolven che innotzente.
Faghet su colpu e no l’at bida zente
e paret un’oggetu malleàbbile:
su coro umanu est tropu impenetràbbile,
no b’intrat lampadina ne currente.
Est sa natura chi l’at fatu gai
e lughe no bi nd’at intradu mai.
- Sozu (54”)
Inue cheres agatare iscampu
tantu a tie ’e mi tenner suggetu?
Cheres fagher mancari unu dispetu
ma pàrtiche sa lughe de unu lampu:
s’as in coro o in mente unu progetu
lu deves nessi cras bogare a campu.
Siat de calidade o de reatu,
sende in sa lughe s’ischit su chi as fatu.
- Piras (47”)
Ma unu pagu a mie cumpiaghes
sos tempos passan lentos, finas ratos.
Abbàida sos antigos palatos
fatos a muru ’uldu e ti nde braghes:
tue ’ies a sa lughe sos nuraghes
però no ischis chie los at fatos.
A sa lughe est che altare mazore
ma no ischis chie est su costrutore.
- Sozu (54”)
Sos mastros sun da ora sepellidos,
tracia ’e iscritos no nd’ana lassadu
ma est a facia a sole s’operadu:
fortetzas, chejas o nidu ’e bandidos
però da chi atentos los an bidos
nde an ogni progetu istudiadu
si comente a ischire no si prestat
ma a s’iscuru s’òpera no restat.
- Piras (49”)
Ma deo apo leggidu e domandadu
chie est su costrutore ’e sos palatos.
Naran ch’est Dedalo chi primu est istadu
ch’at postu gai sos massos cumpatos
ma niunu no s’est mai azaldadu
a poder narrer chie los at fatos.
S’’idet iscala cun bòvida e muru
ma su chi fatu l’at est in s’iscuru.
- Sozu (59”)
Ja ti nd’abbizas, no b’isto in su jogu
mancari chi ti ponzas in intrigos.
Sun postos in sa punta de ogni logu
po s’’ider sende in paghe o in castigos
e-i sa note tando a lughe ’e fogu
faghian su signale a sos nemigos
prite sa lughe po tota sa vida
ammenta ’e sos umanos est guida.
- Piras (43”)
Ma como a mie a fiancu ti jughe,
a sa rejone tzertu ti piegas.
Abbàida bene a fora est una nughe,
tue a ti la papare ti l’intregas,
ma ca in su criu no bi jughet lughe
ja ti nd’abbizas a da chi la segas.
Primu po nughe ’ona l’as leada
e a da chi la segas est manciada.
- Sozu (57”)
Da ch’a lughe la ’ides a su jaru
a sa nughe su preju li as a dare.
Sas naves chi viaggian in su mare
in sas tempestas chìrcana riparu:
ana sa lughe ’e s’istella polare
poi miran sa lughe de unu faru.
Su dificile mesu ’e traspoltu
sa lughe los guidat a su poltu.
- Piras (41”)
Sa lughe est signale, ti l’atzeto puru,
ch’est su fenale e-d-est faru divinu.
Una nave si ponet in caminu
e-i s’andare li paret seguru
ma b’est in mesu unu sutamarinu
chi l’iscudet da tretu su silluru.
E-i sa nave ingénua nde fiat:
chie fut in s’iscuru no l’ischiat.
- Sozu (47”)
Tue rejone cheres dare a mie
da chi in mare m’atopas a caminu.
S’iscuru e-i sa lughe bi est inie
ma chie tenet mezus su destinu?
Tue non bides su sutamarinu
ma su sutamarinu ’idet a tie:
sa prima ’olta leat un’abbagliu
poi podet colpire su bersagliu.
- Piras (43”)
Su capitanu tantu genuinu
abbàidat a fiancos e in altu.
Sa nave est cun sa vela a bolu ispaltu
ma sa morte l’atendet a caminu:
abbàida, po timer un’assaltu,
una nue fumògena ’e continu
a ispargher in mare si preparan
e da ch’est a s’iscuru no isparan.
- Sozu (58”)
Ma sos razos los faghen viaggiare
gai t’agatan cun facilidade,
sos bengalas chi lughe ’etan a pare
sa via abberin cun abbilidade:
léadi unu semaforo ’e tzitade
inue b’at tres lughes totu umpare.
Su ’ilde est su chi dat istrada a tie
e su ruju ti narat: frima inie.
- Piras (38”)
Sa lughe est bella si ’essit a su jaru
e tue ti nde ’antas de seguru.
Pero su ladru a da ch’’iet su faru
a boltas l’iscudet una pedra puru
e-i s’afare faghet a s’iscuru,
si cheret da sa lughe a su riparu.
Tzeltu cussu chi lughe no domandat:
faghet su colpu e da poi si ch’andat.
- Sozu (51”)
Unu ladrone o fina unu bandidu
ch’est armadu ’e pistola o de ’olteddu
mannu ’ochire cheret e piseddu
e narat chi s’iscuru no at timidu
però b’at sempre un’oju chi l’at bidu
finas sa note de iscuru nieddu.
E tando a tie cun totu sos ladros
ti faghen aer sa lughe a cuadros.
- Piras (39”)
No, a fagher su malu est unu jogu
e no lu punin sempre s’assassinu
ca lu faghet a tempus e a logu
e a sa lughe no passat vicinu.
Nàrami, Peppe, in custu lominu
abbaidéndelu no bides su fogu:
istrìscialu e a sa lughe das sa vida
ma prim’’e l’istrisciare no l’as bida.
- Sozu (55”)
Est de sa morte sua su destinu
poite ’e vida nde tenet pag’ora.
Ma si gai l’as muntesu ’e continu
ti naro deo, sa proa nde onora,
ca s’ischit solamente chi est lominu
a da chi nd’est sa lughe ’essida a fora.
Da ch’at sa lughe tando at fortza e briu,
da chi no at sa lughe no est biu.
- Piras (46”)
Ma deo su lominu apo fingidu:
ch’est in s’iscuru e de lughe at virtudes.
Cando s’atalzu a sa pedra l’iscudes
nde catzas s’ischendita, as ammitidu.
Ma sa pedra at su fogu remunidu,
bisonzu chi s’iscuru lu saludes.
A da chi l’as iscuta po calch’ora
sa lughe remunida ’essit a fora.
- Sozu (59”)
Mi dias cherrer narrer cosas noas
prite su donu cantende l’impitas.
Cun sa pedra rifletis e medìtas,
non pretendo in bujaca la costoas
prite li colpas s’atalzu e la proas
si a fora ti ’ogat ischinnitas.
Tando as ischidu chi est pedra focaia
si no l’impitas po pedra ’e ghiaia.
- Piras (39”)
Giove cando criadu at a Pandora
s’iscàtula serrada ’i l’at ofelta.
L’at nadu: fèmina sabia e onelta,
no abbelza s’iscàtula in cust’ora.
Cudda malefadada l’at abbelta,
che sun bessidos sos males a fora.
E puite ch’’essein de seguru?
Ca fun totu sos males in s’iscuru.
- Sozu (51”)
Ma cun Pandora in cussas oras tristas
fat’as bella un’otava improvisada.
Ma in debbadas sa mente ti pistas
a da chi intro no ischis ite b’ada:
comporende a iscàtula serrada
tue no ischis mai ite acuistas.
Ma deo poto esprimer ogni votu
chi ’ogo a campu e a sa lughe a totu.
- Piras (36”)
Deo apo s’iscuru cumbinadu
ca tenzo mesu iscuras sas bideas.
Nàrami, e cantos no nd’an imbrogliadu
cussas ànimas malaitas feas:
fina un’assegnu a bòidu t’an dadu
e tue ses ingenuu e lu leas.
Primu ch’est a s’iscuru lu manizas,
da ch’andas a su cambiu ti nd’abbizas.
- Sozu (
……………………………
…………………………….
………………………………..
…………………………………
osserva in ojos e cun ochiales
a controllare bene sos assignos
ca s’a sa lughe a tie ti lu donan
si lu cumprendet mai lu bufonan.
- Piras (41”)
Abbàida unu grecu ’e bellu tipu
chi in sa mitologia tenet fama.
A Giocasta l’at isposada Edipu
e Giocasta a Edipu li fut mama:
cudda isposat su fizu e, pe’ in tzipu,
lu cret isposu e ruta est in sa brama.
Tantu sa vida gasie si rendet:
de sa vida niunu nde cumprendet.
- Sozu (50”)
Si su fizu diventat su maridu
deo una cosa narrer ti cheria.
Su mastru l’at iscritu e l’as leggidu
e-i como no l’ischis tue ebbia
ma si nisciunu l’aiat ischidu
no fit bàlfida sa mitologia:
aian tentu immensu piaghere
e fin bistados maridu e muzere.
- Piras (42”)
Sutzedit, deo ti naro subbìtu
chi sa mitologia est inventada.
Sos poetas l’an gai immaginada,
an criadu ’e s’Olimpu s’infinitu:
su chelu che l’an postu in altu situ,
s’inferru in terra buja ilfundorada.
La pensat diferente o custa o cudda:
totu est iscuru e no si nd’ischit nudda.
- Sozu (53”)
Dae s’abbissu a su regnu ’e s’acisu
a che passare paret unu jogu.
Si est beru comente Paradisu
a bi ponner iscuru non bi at logu
e si s’inferru osselvas de pretzisu
nachi allutu bi est sempre su fogu.
Gai su chelu ispetat totu a tie,
deo in mesu s’inferru vivo inie?
- Piras (27”)
A mie mi che pones s’iscuru,
Peppe, unu piaghere ti domando:
si de su chelu tue ses seguru
baebbei chi deo ti che mando
però deo a s’inferru no be-i ando,
tue a su chelu ja no b’andas puru.
Tantu chi lu pessamos be-i creo
ma no nd’ischimos ne tue ne deo.
- Sozu (51”)
A da chi semus in bona armonia
su còmpitu no parit meda duru.
O b’apat lughe o chi b’apat iscuru
partire ancora deo no cheria
ma po cantu ti lughet sa pupia
chi ses inoghe ses sempre seguru.
Si poi b’est s’ignotu po ambosduos
sun contos, pensa, totucantos tuos.
- Piras (34”)
Noè sa prima ’inza at piantadu:
faghet su ’inu, est sou e no lu pagat.
L’at gosie a sa lughe abbaidadu,
ca li pariat bellu che lu tragat
e da chi bonu pagu nde at bufadu
no ischit chi su ’inu l’imbreagat.
Sa foltza de su ’inu iscura est goi:
da chi s’est cotu l’at connotu poi.
- Sozu (50”)
Ma istrumentos oe chi ogni frutu
poden fin’in s’internu controllare.
Caru Remundu, non deves bufare
finas a cando ses in terra rutu:
pensa a sa lughe a ti l’abbaidare
gai t’abbizas si est netu o s’est brutu.
Si a sa tzega a s’ampulla t’atzufas
no as bidu nemmancu su chi bufas.
- Piras (31”)
Ma Noè no nde fut tantu seguru
chi su ’inu at ocultas fiamaridas.
Poi chi l’at bufadu cussu puru
at nadu: ma, Noè, ite ti fidas?
Abbàida, sas cosas preubbidas
po su pius si faghen a s’iscuru.
E totucantu propìtzios sunu
ma però chi no los bidat nisciunu.
- Sozu (
Est a s’iscuru po àtera zente
no …………..est a cumone.
………………….atentzione
esaminende est continuamente:
cantu b’at a s’internu ’e sa persone
lu penetrat cun sa lughe potente.
Ti paret a iscuru sa dimora
ma cun sa lughe s’’idet dae fora.
- Piras (38”)
Tue s’iscuru meu che allontana,
però a mie no m’as persuadidu.
Sa fragilesa ’e sa persone umana
prenetàrela pagu est permitidu:
una chi faghet una festa a bajana
no l’iscòbiat mai a su maridu.
Su maridu la tenet che matrona:
mancari mala la leat che bona.
- Sozu (52”)
Como che pones sa limba in sa braja
tzeltu ’e amore intonéndedi un’innu:
no mi nde dia fagher unu sinnu,
in conca no mi falat che mannaja.
Ma no sutzedat che-i sa casteddaja
chi l’at iscobiada su pitzinnu
ch’aiat commitidu unu reatu
e-i su fizu est nàschidu mulatu.
- Piras (37”)
A cussa l’est gasie cumbinadu
chi l’at iscobiada cussu erede.
Ma bi nd’at chi nd’an fatu e nd’an passadu,
sa domo issoro ’e Cùpido fut sede
e-i su male l’an campaniadu:
pregonta a su maridu e no bi crede.
Mancari jutat corrimentas russas
narat: muzere mia no est de cussas.
- Sozu (48”)
Da ch’as bogadu una frase ecellente
de totu bene b’istat in sa festa.
Ma in s’iscuru ses e inie resta,
tando pecadu no b’at po niente.
S’a su maridu ponet cosa in testa
est signu chi l’at bida àtera zente:
ja l’at fata a s’iscuru s’aconcada
però sa lughe l’at iscobiada.
- Piras (45”)
A lughe no bessit mai e l’an cantadu
finas cuddos poetas pius mannos.
Bi nd’at chi funi etèras tantos annos
e calchi filosofo ja ch’est incapadu.
Narat su diciu chi no b’at ingannos:
su pecadu in cuerru est perdonadu.
S’est in cuerru su pecadu meu
paret chi mi perdonet finas Deu.
- Sozu (49”)
Tzertu pro contu tou as intzeltadu
ma t’ispiego a momentu oportunu
chi fin’a ue sos males bi sunu
chi nisciun’ischit de chie at mancadu:
si no nde diat ischire nisciunu
nemmancu no esistit su pecadu.
Est permissu ’e fagher totu in donu
ca restat a s’iscuru malu e bonu.
- Piras (40”)
Malu est cando a sa lughe altzat in prua
ma b’at vergines castas in difetu.
Cheria pregontare deo a cua
s’ispiju ch’an in camera ’e letu:
cantas boltas a cussa facia sua
den aer cunfidadu ogni segretu.
E puru castas virgines ja sunu
puite no las at bidas niunu.
- Sozu (50”)
Mi parit ch’ora siat de finire
lassende in paghe su campu ’e s’amore.
Su chi si faghet totu a su lugore
de su mundu ja devet aparire:
a su fiore po narrer fiore
penso devat innanti fiorire.
A da ch’est a sos pètalos connotu
chi est fiore l’an ischidu totu.
- Piras (33”)
Fininde dividimos perra-perra
però sa palte mia no est ingrata.
Abbàida sas cosas de sa terra,
palte a sa lughe e a s’iscuru est fata:
podes abbaidare sa patata,
su frutu che lu ponet sutaterra.
S’avivat su fiore e-d-est seguru
ma su mezus che faghet in s’iscuru.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: archivio Domus de janas