Un’atra dì de fogu cussa de eriseru in Sardigna. In totu funt bintotu is fogus postus e in undixi de custus, po ddus binciri, si funt umperaus elicoterus e Canadair.
In Siamaggiore, in logu “Sa Nassa, est erribau un’elicoteru de sa basi de sa forestali de Fenosu. A nde ddu morri c’ant pensau una truma de Forestas chi trabagliat in su cantieri Massama Campulongu, totu ghiau de sa Statzioni forestali de Oristano. In Cuartuciu, in logu Riu Piscina Nuscedda” funt erribaus tres elicoterus de is basis de Villasalto, Pula e Santu Cosimu.
Unu de is fogus prus mannus fut in Oniferi, in logu Corodda, aunia funt erribaus tres elicoterus de is basis de sa forestali de Farcana, Anela e Fenosu e tres Canadair puru, dus de Terranoa e unu de Ciampino.
In Uliana, in logu Badde Manna, est, invecias, erribau un’elicoteru de sa basi de Sorgono.
Mericeddu de fogu finas in Sinnia, in logu Riu Longu, aunia est intervenniu un’elicoteru de sa basi de Pula. In Macumere, in logu Su Muzzone, funt intervennius tres elicoterus chi erribaiant de Bosa, Alà dei Sardi e de Fenosu.
In Vallermosa, in logu Serra Antoni Sanneri, si funt acostiaus tres elicoterus de Pula, Villasalto e Marganai. In Santu Sparau, in logu Piscina Figus, invecias, funt cuatru is elicoterus chi funt erribaus, a ismorri fogu, de Pula, Marganai, Villasalto e Fenosu.
Parit un’istadi comenti de sempiri, a dolu mannu, fogus in donnia e pagu trabagliu in is atrus mesis a puliri is logus chi andant pulius.
Cussu chi fait prus a timiri est su arrespetu pagu chi tenit chini ponit fogu po sa terra sua, po s’Isula nosta, chi non tenit abbisongiu de custus problemas mannu: ita serbit po ddu fairi cumprendiri? Serbit a ponni conca a is libburus e a tenni curtura, intra e bessi est sempiri custu cussu chi contat de prus: s’Ignorantzia est meri de chini picigat fogu!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Fuoco
