“Su Guvernu si pigat sa fiducia finas in su Senau. Imoi tocat a trabagliai po fairi intrai prus genti in custa magiorantzia. S’Italia non tenit mancu unu minutu de perdiri, inderetura nosi poneus a trabagliai po binciri s’emergentzia de sa saludi e sa crisi economica. S’atentzioni est totu po is vacinus e su Recovery Plan”.

Custus funt is fueddus de su presidenti de su Consigliu Conte a pustis sa fiducia – est a nai cun pagus votus de prus – pigada in su Senau a pustis cussa de sa Camera. A s’acabu de sa dì de eriseru su Guvernu at pigau 156 votus a favori, is senadoris de Italia Viva no ant votau né ca giai né ca nou. Su Guvernu at pigau is votus de dus senadoris de Fortza Italia, Maria Rosaria Rossi cun Andria Causin e sa presidenti de su Senau Casellati at fatu contai finas is votus de Ciampolillo e de Nencini, po custu sa dresta at morrungiau meda.

Ita sussedit imoi ? Giai in custas oras, massimamenti, s’ant a atobiai totu is partidus de sa magiorantzia po torrai a fairi partiri is trabaglius de su Guvernu e, comenti at nau craramenti Conte, in su giru de una pariga de cidas est possibili chi calencunu nomini sartit e dd’intrit calencun’atru. Sempiri custu mengianu Conte at a bessiri de su presidenti de sa Republica Sergiu Mattarella po ddi nai comenti funt andadas is cosas eriseru.

Sa bataglia manna po s’abogau pugliesu est cussa de cicai genti noa po non fairi baddai tropu su Guvernu. Su pensamentu est totu po Italia Via.

Mateu Renzi, a pustis de sa fiducia, at nau ca “si podit chistionai de totu ma non cun sa dresta de su Parlamentu e podeus chistionai puru de unu Guvernu de unidadi natzionali. S’est cicau de cunvinciri is senadoris e a sa fini is numurus non funt cussus chi s’aspetaiant. Unu stadu in crisi non si guvernat cun custus numurus. Ci funt possibilidadis medas, ma Conte pensat prus a is postus de cumandu chi a s’Italia”.

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto:https://www.ilmessaggero.it/politica/governo_crisi_fiducia_senato_maggioranza_semplice_cosa_succede_oggi_ultima_ora_19_gennaio_2021-5709197.html