E imoi funt ses is partidas perdias de sighiu de su Casteddu: cincu in campionau (cun  Roma, Napoli, Benevento, Fiorentina e eriseru cun su Milan) e una in Coppa Italia cun s’Atalanta.

Su Casteddu giogat meglius, chi pensaus a is urtimas partidas, ma non ce dda fait a non perdiri e imoi est de undixi dominigus chi non bincit. In Casteddu acabat 2-0 po sa scuadra de Pioli ca bincendu torrat a aguantai sa conca de sa classifica. A nai sa beridadi, su Milan, no est chi apat fatu meda ma est bastau Ibrahimovic. Su svedesu at fatu dus gol: unu, de is undixi metrus, in su primu tempus e s’atru in su segundu. Di Francesco at fatu giogai inderetura su giogadori nou Duncan, comporau de sa Fiorentina sa cida passada e at fatu calai in campu, a s’incumentzu, custus piciocus: Cragno, Zappa, Ceppitelli, Godin, Lykogiannis, Nainggolan, Marin, Duncan, Pereiro, Joao Pedro, Simeone. In segus funt intraus finas Oliva, Cerri, Pavoletti e Sottil.

Imoi sa panchina de Di Francesco baddat de averas e, po cussu chi parit, at essi sa partida cun su Genoa de Ballardini a nai ita at a fairi su presidenti Giulini.

S’allenadori abrutzesu at chistionau a s’acabu de sa partida cun is giornalistas e at nau: “Lastima manna po su segundu gol pigau cun d’una bocia facili e po su rigori chi non s’ant donau ca podiat torrai a oberri sa partida, ma candu is tempus funt dificilis nudda girat beni. Ibra est prus espertu e abistu de Sottil”. At a pustis sighiu: “Non seus stetius bravus meda in s’urtimu passagiu, cussu chi mancat oi funt is puntus in classifica, creu chi siat unu problema prus de conca chi de giogu”.

Su Casteddu imoi s’agatat cun d’unu puntu in prus de su Torino e de su Parma chi funt is scuadras, acabaendu oi su camponau, chi ci iant calai in serie B. Tocat a donai atentzioni manna ma seus segurus chi Di Francesco dd’at a fairi bessiri sa scuadra de custa situatzioni. Dominigu, comenti eus giai nau, si giogat totu in Genova, ca de candu est erribau Ballardini est andendu beni meda e dominigu passau at liau unu puntu de su campu de Bergamo.

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://it.wikipedia.org/wiki/Eusebio_Di_Francesco