Sa festa est cumentzada in s’albergu candu su Crotone, cun d’unu gol de Simy, at paregiau contras de su Benevento. Cussu gol boliat nai ca su Casteddu si sarvaiat cun sa matematica puru, ca su Benevento abarraiat a tesu de cincu puntus. Ma no est finia sa festa ca poi a merì is piciocus de Semplici s’ant pigau unu puntu in sa partida de San Siro cun su Milan. Puntu chi podiant essiri tres poita Donnaruma, su portieri milanista, at spantau cun paradas de macus.
Lionardu Semplici, omini intreu chi at sarvau su Casteddu, at chistionau a s’acabu de sa partida cun is giornalistas: “Su campionau po nosu est cambiau meda a pustis de airi perdiu sa partida in Casteddu contras de su Verona, sa dì a innanti de Pasca Manna. Nosi seus chistionaus in manera crara e eus cumprendiu ca cussu chi fustis fendu no andaiat beni. Is piciocus ant cumprendiu ca depiant cambiai sa manera de giogai, poita custu Casteddu non depiat tenni sa classifica chi teniat. Eus cumprendiu ca depiaus tenni un’atra mentalidadi in campu e feti ca totu paris ndi podiaus bessisi. Esu fatu una cosa manna a beru e totu est partiu de sa partida contras de su Parma candu ddu eus giumpaus in d’una pariga de minutus”.
At chistionau, comenti est giustu chi siat poita c’at postu sempiri sa cara, su presidenti Giulini: “Seus totu allirgus, finas chi totu pariat dificili. Eus castiau sa partida de su Benevento cun su Crotone e podeus nai ca a giogai ocannu chi benit ancora in Serie A est giustu, nosi ddu meritiaus. Totu est cambiau in sa partida cun su Parma, cussu gol de Cerri a s’urtimu minutu nos at agiudau meda po cumprendiri ca ce dda podiaus fairi. Sa scuadra baliat e balit e is piciocus ant fatu unu meraculu sportivu, finas candu is cosas no andaiant beni no ant mai certau. Candu est cumentzau su campionau non s’aspetiaus custa classifica, ma a bellu a bellu totu is giogadoris ant postu una perda po nosi sarvai. Non tocat a si ndi schesciri”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.youtube.com/watch?v=XjgWQx5fe80
