Su prefetu de Casteddu Giuannifrancu Tomao, su presidenti de sa Regioni Christian Solinas e su sindigu de Casteddu Pàulu Truzzu funt is autoridadis chi eriseru a mengianu, in su “Parco delle Rimembranze”, sempiri de Casteddu, ant postu una corona de laueru in su “Monumento ai Caduti” po sa Festa de sa Republica italiana, chi eriseru lompiat is setantacincu annus. Totu, a pustis, est sighiu in su Conservatoriu citadinu, aunia ant doanu is onoreficentzias de su presidenti de sa Republica Sergiu Mattarella. Funt aici diventaus “Cavaliere dell’Ordine al Merito della Repubblica italiana”: Giuanni Atzori, Assistenti Capu de sa Politzia, Giusepu Carboni, Consoli onorariu de sa Bielorussa, Ferdinandu Coghe, dirigenti sanitariu, Pieruluisu D’Angelo, dirigenti generali de sa Politzia in pensioni, Alisandru Floris, dipendenti de s’AOU de Casteddu, Giuannipaulu Lampis, funtzionariu de is Vigilis de su fogu, Luigina Maccioni, operatrici sociali, Andria Mannoni, Capitanu de s’Esercitu, Carrulu Mascia, cumandanti de is carabineris de Lunamatrona, Francu Muceli, sempiri de is vigilis de su fogu, Elisabetta Murgia, funtzionaria de s’Agentzia Demanio de Casteddu, Perdu Paulu Murru, dirigenti scolasticu in pensioni, Adelina Onnis, Infermiera de s’ATS Sardigna, Pàulu Protto de is vigilis de su fogu, Sergiu Rossi, dirigenti de un’azienda privada, Simoneta Santus, dotoressa de s’ATS, Istevini Scionis, de is vigilis de su fogu, Giorgi Carrulu Steri, comissariu beciu de s’ATS, Sirvana Tilocca, dirigenti de s’ATS Sardigna e a su maresciallu de sa Finanza Giuannifrancu Zucca.
Un’atra onoreficentzia, cussa de “Ufficiale dell’Ordine al Merito della Repubblica italiana” dd’ant donada a su numuru dus de su prefetu, Andria Leo e a su funtzionariu de su Ministero delle Politiche Agricole, Renzo Moro.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Presidente_della_Repubblica_Italiana
