Is novas malas po sa pesta de su coronavirus in is urtimas cidas funt sempiri prus pagas. Funt sempiri prus pagus cussus chi s’impestant finas chi ancora non si podit nai, po nudda, ca sa pesta dda eus binta.
Chini tenit de is seigi a is trintanoi annus si podit prenotai, po fairi su vacinu, de mesudì de oi. In Sardigna sa cosa interessat a prus o mancu 230mila personas.
Po si prenotai tocat a instai in su giassu de is Postas e serbit feti su codici fiscali e sa tessera sanitaria. A pustis sa prenotatzioni su sistema at a donai sa dì e su logu aunia andai.
Eriseru in Casteddu eus tentu su numuru prus artu de vacinaus in d’una dì: tremila e cuatrucentus! Sa genti chi s’est acostiada a sa Fiera eriseru a mengianu e a merì si funt fatus vacinai cun su Pfizer, AstraZeneca e Moderna. In su noti, invecias, in su Astranight aprontau de s’ATS Sardegna, funt stetius vacinaus milli e trexentus professoris de is scolas medias e superioris, massimamenti cussus chi depint fairi is esamis de maturidadi e de licentzia media.
In su fratempus funt bessius a 56.768 is impestaus a su coronavirus in Sardigna de su mensi de frairgiu de ocannu passau. Is urtimus numurus chistionant de trintatres impestaus nous. Is mortus bessint de tres e imoi in totu, de martzu de ocannu passau, funt erribaus a 1.458. In is aposentus de is ispidalis si ddue agatant centubintiseti tra mascus e feminas e in sa terapia intensiva su numuru est su matessi de una pariga de dis: catodigi. Incungiaus in domu funt in totu 12.413 e cussus sanaus, cun is centu de eriseru, funt 42.746.
Is 56.768 impestaus funt aici dividius in su territoriu: 14.856 in sa citadi metropolitana de Casteddu, 8.654 in sa provincia de su Sud Sardigna, 5.159 in sa provincia de Aristanis, 10.887 in cussa de Nugoro e 17.198 in sa provincia de Tatari.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://quifinanza.it/info-utili/video/vaccino-astrazeneca-seconda-dose-trombosi-trombocitopenia/497415/
