Una natzionali de fubal spantosa cussa chi eriseru at bintu sa prima partida de is Europeus in Roma. Sa Turchia, chi totus creiant atra cosa, a nai sa beridadi, ddas at buscadas de una scuadra posta beni in campu e cun calencunu giogadori, massimamentti Barella cun Jorginho, chi ant dominau a centrucampu. A pustis unu primu tempus aunia s’Italia giai at cumandau, ma feti po duas bortas s’est acostiada a sa porta de is turcus, in su segundu non ddu est stetia peruna storia: Demiral, su difensori de sa Juventus, chi segnat in sa propia porta, e in segus Immobile cun Insigne ant decidiu sa partida!
Mancini at intzertau totu de averas, prus che a totu in sa manera chi at fatu giogai sa scuadra e non in is ominis, seus segurus ca cambiendu finas calencunu giogadori non cambiat po nudda su modu de abarrai in campu. Est una scuadra chi giogat sempiri po binciri e podit, a parrer nostu, erribai finas in fundu in custa manifestada chi at acabai dominigu 11 de triulas, chi est una dì nodia po chini sighit su giogu de bocia: sa natzionali de Bearzot e de Pàulu Rossi, bincenduru cun sa Germania, diventaiat campioni de su mundu.
Fustis nendu ca s’Italia podit erribai atesu meda, castiendu is atras scuadras forsis feti duas funt prus fortis: sa Francia chi fait a timiri deaveras e su Belgiu de Lukaku. Ma cun is atras si dda giogat chena de timiri, non parit chi scuadras che sa Germania, sa Spagna o s’Inghilterra siant prus fortis de is piciocus de Mancini.
Imoi, po una pariga de dìs, is italianus si pasant, sonumancu finas a mercuris candu ant a giogai sa segunda partida de su gironi contras de sa Svizzera, sempiri a is noi oras de merì e sempiri in Roma. Fendu atrus tres puntus cun sa scuadra de Petkovic, chi in Italia ddu arregodaus po airi allenau sa Lazio, si podit giai pensai a chini s’atobiat in is otavus de finali.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.youtube.com/watch?v=wVPkAHJ2_Ds&ab_channel=DanieleBrogna
