A pustis airi timiu meda, e chi nd’at leau su sulidu a totu su mundu de su fubali, Christian Eriksen, su giogadori de s’Inter e de sa natzionali de sa Danimarca chi at tentu un’intrecoru in sa partida de is Europeus contras de sa Finlandia, abarrat in su spidali, e istat beni, o meglius naraus ca est meglius de comenti est intrau.
De cussu chi si narat Eriksen si podit pensai a su meglius: difatis est cuscenti e cussu e totu at donau novas bonas de sa saludi sua a is amigus, cumentzendu de is cumpangius de natzionali, a pustis essiri erribau in su spidali, e cumbidendudeddus a sighiri sa partida cun is finlandesus, chi, po cronaca, ant dapoi bintu po 1-0.
Eriksen at scritu finas a sa scuadra sua de s’Inter, comenti at nau finas su diretori sportivu Marotta, sempiri po fairi sciri ca istaiat beni.
De lassai chena fueddus cussu chi at contau su dotori de sa Danimarca chi est intrau in campu: “Christian fut mortu. Non sciu comenti ddu eus torrau, est sussediu totu allestru meda”.
In su web, in su fratempus, benit doanu importu mannu a cussus chi ant agiudau Eriksen: dotoris massimamenti ma finas is massagiadoris. Ma a si pigai fueddus durcis che meli est, prus de totus, su capitanu de sa Danimarca, e difensori de su Milan Simon Kjaer chi est stetiu unu de is primus a si nd’acatai de cussu chi fut sussediu: nde dd’at bogau sa limba po non ddu fairi allupai e ddu a postu de costau comenti narant is regulas, a innanti de erribai is atrus agiudus. In segus at cumandau a is atrus giogadoris de ss iponni indenanti de is telecameras e candu est intrada Sabrina, sa pobidda de Eriksen, est stetiu su primu a si ddue acostiai po dda imbrassai e a dda fairi abarrai trancuilla: at tentu a beru sanguni fridu Kjaer e tocat a tenni coragiu mannu.
At fatu s’omini su capitanu de sa natzionali de sa Danimarca e custu est una paristoria de fairi connosciri a totus.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.stopandgoal.com/2021/06/13/eriksen-motivo-malore/
