Su virus de su covid torrat a curriri in Sardigna e giai nascit s’arriolu po s’atongiu chi benit, poita at essi dificili meda, in cabidanni, a tenni su 70 o s’80% de vacinaus. Sa varianti Delta cumentzat a s’ammanniai e sa Sardigna est sa segunda, in s’urtima cida, po is numurus in percentualis, a palas de su Molise.
Eriseru funt otantases is impestaus nous e unu numuru aici non si biat de su 14 de maju. Andaiat postu in contu, totu custu, poita is variantis noas picigant de prus. Arriolant is numurus de calencuna bidda, comenti Serrenti, o un’atru casu in su casteddaiu aunia s’est festada una coja.
“De seguru si podit nai ca sa varianti Delta, in pagus tempus, at essi sa prus arta comenti de numurus, ma est una cosa normali”, faint sciri de s’Aou de Tatari. Est de nai ca po s’ora is impestaus nous funt totu piciocus a suta de is trintacinc’annus, chi, cuasi mai, erribant in is aposentus de is spidalis, ma a pagai podint essiri totu cussus chi gimpant is sessant’annus chi vacinu non ddi ant fatu.
A custu puntu si castiat s’orruga chi at pigau sa Francia: chini non tenit su green pass non podit intrai in is ristorantis, in su cinema, in is tiatrus o a sighiri calechisiat sport.
In pagus fueddus tocat a fairi duas cosas: cicai de frimai sa pesta de una parti, e de coidai a vacinai cantu prus genti de s’atra, si nono in atongiu dda eus pagai a caru pretziu. Nemus s’arregodat prus cussu chi est sussediu ocannu passau a pustis de s’istadi maca chi eus passau in Sardigna e in totue? Boleus torrai a cussu? C’at genti chi at sunfriu meda e parit chi est de macus a non si vacinai.
Dipendit meda puru de s’abistesa de sa genti chi depit sempiri sighiri is regulas de stesiamentu e totu is atras chena aspetai sa manna de su celu.
Ma parit ca a samunai sa conca a is molentis non serbat a nudda!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.fanpage.it/attualita/dove-stanno-crescendo-i-contagi-a-causa-della-variante-delta-la-mappa-in-europa/
