Mateu Salvini, su capu de sa Lega, torrat a carrigai su presidenti de su Consiglu Màriu Draghi pedendu de torrai a oberri is discotecas giai de custu acabbu de cida. “Apu pediu de torrai a oberri is logus aunia si baddat e is discotecas, issus funt giai prontus a torrai a oberri giai de cras, cun totu is regulas chi serbint”, at nau Salvini bessendu de Palazzo Chigi. “A ddas tenni ancora serrads est unu machiori, non cumprendu po cali arregioni sanitaria, curturali, sociali su ministru Speranza poderit s’Italia comenti s’urtimu Stadu in Europa a non torrai a oberri is logus po is giovunus. Funt in giogu medissimus postus de trabagliu: centumila e tremila siendas a erriscu mannu!”.
Is meris de is discotecas eriseru ant torrau a pediri de atobiai su Guvernu: “Boleus atobiai cun urgentzia su Presidenti Draghi. Serbit una dì segura po torrai a partiri”, ant fatu sciri a pustis unu atobiu aunia ddue funt totu is interessaus: Silb-Fipe-Confcommercio, Assointrattenimento-Confindustria e Fieper-Confesercenti-Settore Intrattenimento.
“Su 25 de làmpadas – arregodant – su CTS at donau is regulas po torrai a oberri is discotecas e is logus aunia si baddat. Funt passadas cuasi tres cidas e ancora no eus tentu sceda. In s’ora in totu is citadis italianas milionis de piciocus e piciocas baddant e festant in is prassas e in logus chena peruna regula, invecias is discotecas, a s’imbessi, donant totu is garantzias cun s’intrada feti po chini tenit su green pass. Totu custu est de macus: teneus abisongiu de una dì segura po torrai a partiri e ndi teneus abisongiui inderetura”. In prus is gestoris pedint dinari po totu cussu chi ant passau in custus dixiotus mesis, is controllus po chini fait festa chena regulas e chena permissus, su calu de s’Iva a su cuatru po centu.
“Non seus pedendu sa luna, serrant, custu nosi parit su minimu po cussu chi eus passau!”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.viaggiamo.it/migliori-discoteche-cagliari/
