Sa dì de su Lunis de Pasca Manna s’Unipol Domus at essi prenu che un’ou. Difatis s’andat bia su prenimentu de is seixi mila, cantu ndi podit poderai su stadiu, po castiai su Casteddu chi si dda giogat contras de sa Fiorentina. A is tres de a pustis prangiu at essi s’arbitru Liviu Marinelli, de sa filera Aia de Tivoli, a donai su cumentzu a sa partida chi est de importu mannu po ambas is scuadras.
Sa genti sighit, a dogna manera, a comporai su biglietu, ca gai sa cida passada fut cumentzada cun is postus in is Distinti e Tribuna. Est a nai finas ca is tifosus de sa Fiorentina, chi bivint in Toscana, no ant a podiri biri sa partida de sa parti aunia si ponins is tifosus strangius. Cussu logu si podit preniri de cuatrucentus tifosus.
Finas a eris is biglietus bendius, po custa partida chi est sa de trintatres de su campionau de Serie A, funt lompius a 15.800, ma giai de custas oras s’at essi prenu de prus, poita est seguru ca lunis a agiudai is giogadoris s’at a agatai unu stadiu prenu.
In s’urtima partida giogada in Casteddu, cussa contras de su Monza binta po 3-0 si funt bendius giai 16.139 biglietus, chi funt finas su paris de is biglietus bendius a is tifosus de su Monza. Immoi s’agatat sa possibilidadi de giumpai beni custus numurus.
Eris is giogadoris de su Casteddu ant trabbagliau in su mengianu, a pustis chi martis a mericeddu si funt agataus in Assemini, a pustis sa partida cun s’inter de sabudu a merì.
Is piciocus de nicola ant cumentzau trabbagliendu in palestra e dapoi funt calanus in campu po provai sa tatica de umperai lunis.
Chi su Casteddu at a binciri at a ponni, cuasi de seguru, su fueddu acabbu po cantu pertocat sa chistioni de si sarvai, ma sa Fiorentina, chi eris at bintu in sa Confedence League e at a giogai sa partida a innantis de sa finali, est scuadra forti meda. Est massimamenti Kean chi arriolat a Nicola e a is giogadoris de sa difesa. Ma funt prontus mina e Luperto po cicai de ddu frimai.
Màuru Mura
Cenarba, su dixiotu de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.dazn.com/it-IT/home/cw78h6ymtmcp9wuog9a095yc4/4ijlnym79urlos0d6yp78ajcf
