Est mortu, sa noti passada in Torinu, Giampiero Boniperti, bandela po annus e annus, a innanti comenti de giogadori e a pustis comenti de dirigenti e imoi presidenti onarariu de sa Juventus. Iat airi lompiu is norantatres annus su 4 de triulas e de meda si fut intregau feti a sa familia sua.
Cun sa maglia bianca e niedda Boniperti at giogau 459 partidas: 443 in sa Serie A, 13 in sa Coppa Italia e 3 in sa Coppa dei Campioni. Po tempus meda est stetiu cussu chi iat fatu prus partidas in sa Juventus, giumpau feti in custus annus, ca si giogat meda de prus, est a nai, a innantis de Del Piero e dapoi de Buffon. De sempiri juventinu, Boniperti iat contau ca po essiri allirgu ddi iat essi pragiu a tenni in pissu cussa maglia finas feti una borta. At bintu prus de dirigenti che de giogadori: cincu is scudetus gioghendu e totu cussu chi si podit binciri in Italia e in su mundu in palas de sa scrivania.
Boniperti fut nasciu in Balengo su 4 de triulas de su 1928. A pustis de sa gherra iat giogau po un’annu in bidda sua, ma in segus ddu iat comporau su Momo Novarese chi poi ddu at bendiu a sa Juventus po sessantamila francus. De sa juventus nd’est bessiu corantotu annu a pustis. Giogadori ddu est stetiu de su 1946 a su 1961 e dirigenti de su 1971 a su 1994. “Sa Juve no est feti sa scuadra de su coru, ma est su coru miu”, at sempiri nau.
Su dominigu, candu fut presidenti, lassaiat su stadiu sempiri a s’acabu de su primu tempus e ascurtaiat su segundu in s’arradiu. Is partidas prus intendias, de giogadori e de dirigenti, funt cussas cun su Torinu e at sempiri tentu fueddus durcis po custa scuadra, massimanenti po cussa morta in Superga.
Cun is giogadoris at sempiri tentu su gorteddu de sa parti de sa maniga, ma est a nai ca ancora no esistiant is margianis chi pensant feti a su dinari. A pustis de su mondiali spagnolu, bintu de s’Italia, iat postu foras de sa scuadra Rossi, Tardelli e Gentile poita si funt permitius de pediri prus dinari. Una cida frimus, una partida non giogada e in segus ddus iat erricius po fairi su cuntratu nou, comenti boliat cussu e non comenti boliant is giogadoris.
De is medissimus giogadoris fatus erribai in Torinu dus de cussus prus apretziaus funt Scirea cun Del Piero e de is allenadoris non si podit arregodai Giuanni Trapattoni.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.pokerstarsnews.it/calcio/giampiero-boniperti-quando-vincere-e-lunica-cosa-che-conta/4756/
